A Saddat Ibeḥriyen, menεet-aγ seg yemcumen?

0

A Saddat Ibeḥriyen, menεet-aγ seg yemcumen?

Seddaw ubrid aγelnaw 24, iwumi qqaren di temnaṭ-a, abrid wadda, i d-iruḥen akk-in i wasif n Buterwa, yettawi ar ssuq Uẓeffun, deg teγzi n 10 n kilumetr, llan 5 Iεessasen, weεan γer yilel, γef akken d-ttalsen, ttεussun ama ad yekk ssyin ucengu ad yeγdu imezdaγ n tudrin-a, ismawen-nsen: Tala n Tiqqit, Taẓebbujt Iḥemamen, Sidi Xlifa, Sidi Wili, Sidi Qerci, yal amecwar ad tafeḍ lğameε akk d waman, ttwabnan d ixxamen n Leqbayel, sεan agens, lkanun, tigertyal, ticemuεin, ula d igerwajen usewwi. D imukan i yemsebriden, win yeṭṭef ffad ad yessew, win yeṭṭef yiḍ ad yeddari, d ayla n At tudrin i d-yezgan i usawen γef tγaltin, d nutni daγen i ten-yessizdigen, am akken i ssizdigen leğwameε yellan daxel n tudrin-nsen, (ulac taddart ur nesεa ara lğameε neγ sin); Ttawil-a ufan-t yemsebriden d abaγur, ladγa di tallit-nni deg leḥḥun γef uḍar, neγ γef zzayla. Γas akken tura tezri tallit deg i ten-seqdacen, maca werğin nesla, yella win yekksen lḥerma γef imukan-a, armi d asmi yettwabna lğameε amaynut n tẓallit.

At tuddar-a, tseggra-ten-id lgirra n Ledzayer fecclen, terwi-ten armi, i sen-truḥ tuddsa-nni n tejmaεt yellan zik, qqimen-d kan, dhan d usali n tmezduγt deg ara ddarin, rrnu ar waya lewεara n tudert deg zzren; Dγa ufan-asen-id abrid .

Agni n Riḥan akk d Tεinṣert, sεan tuddar-nsen i usawen seddaw wersif wedrar, yiwet ar yidis azelmaḍ, tayeḍ ar yidis ayeffus. Deg tegrawla-nni xlant akk, yal yiwen anda yedda, wid isεan ttawil ruḥen ar Ledzayer, wiyaḍ wwin-ten ar lkka lεesker, imi tefra, ttuγalen-d, maca imi ulac abrid i wakken ad ssiwḍen sselεa i lebni, (yella kan win uḍar yerna yesawen), dγa ğğan-tent akken d ixerban, bnan γef yiri n ubrid ukerrus, am Laεzib Uεakkur, lebni-nsen amaynut bnan-t rrif webrid aγelnaw 24, degmi i ten-yezdi webrid, At tudrin-a, ttdukkulen mi ara ruḥen ar tγiwat Uẓeffun, i wakken ad ssutren ayen i ten-ixuṣṣen, ssawḍen wwin-d aman, trisiti, ma d asuffeγ n waman i wesxen, d tzeqqa n yelmeẓyen, d webrid i imezdaγ yebnan γef ubrid aqdim n taddart, wigi mazal ttrağun deg-sen. (Tura qqaren akk ammer?) asmi akken i d-yenna Daḥman Merẓuq aselway n tγiwant, awit selεa ad tsuffγem aman iwesxen, i d-newwi, tili ass-a, tacercurt n bumellal ad izdigen waman-is i tissit, maca imir-nni, gren-d lebni, n lğameε amaynut, ar yidis n lğameε aqbur n Sidi Xlifa, armi d asmi ifukk, tuddar-nni yedduklen, uγalent uwḍant, yal yiwet tettsewiq i yiman-is, imi aṭas ur neεqil ara iman-nsen deg lğameε-a yettbeddilen di leεwayed-nsen. Yezga-d ger teftist d webrid aγelnaw, deg unebdu aṭas imarrayen i d-yettasen llan wid yuḥwağen asensu, d imukan anda ara ğğen tikerryas-nsen, imi ara adren ar teftist, ma d At ddin, widak-nni kečmen ttakken tiktiwin-nsen, d yedrimen i tiddukla n luğna,(tiddukla n lğunun, akken i s-yeqqar yiwen wemγar) armi bnan aγrab i lğameε-nni aqbur,(rran-t ar lḥebs) akken ur d-yettbin ara ar ubrid ukerrus, lğameε amaynut yuγalen d tasmarḍast deg ufus n wid yellan mgal ansayen n zik, ffγen-d εinani ar wencad anwa ara ṭṭfen a t-senduddin, rrnu γer waya, ccix uzen-t-id di tneγlaft n wesγan, i t-ittxeliṣen, i s-id-yettakken acu ara d-yini, s tneqqisin-a akk, i ssawḍen serγen tigertyal, rrdawi, rrẓan lemsabeḥ, ticemuεin, qelεen ijeğğiğen γef iẓekwan, di leğwameε-nni iqburen n Sidi Xlifa, d win n Sidi Σli Weḥend, yellan di taddart taqdimt. Qqaren daγen, zziyara akk d usiγi n teftilin, d leḥram di ddin n lislam, imi ala di ligliz n Kaṭulik ixeddmen akka. Ulama yettwakkes leqdder γef imezdaγ n tuddar-a, maca ssusmen ur smeγren ara talluft, nnan kan a γ-yemneε Rebbi deg wayen yugaren aya, wid iwumi yeqber wul, ggulen ur uγalen ad ẓallen anda ireğmen ansayen, d yedles i d-ğğan imezwura.
Ttuwkelxen s laman Rebbi, armi i sen-ṭṭfen lğameε n Sidi Xlifa, tura atan kkren-d yelmeẓyen gan asegraw n taddart, yekkaten a d-rren lḥarma, d wansayen n tjaddit, ad kksen aḥettem i d-yeγlin fell-asen. Tadyant-a yeḍran di taddart n Ugni n Riḥan, attan tḍerru ass-a di taddar n Uγrib, d lğameε n Sidi Ğaεfer i d-gubren a t-ṭṭfen daγen; Cwi kan At Jennad ukin, nutni ur ten-ttkellixen ara, imi bdan yakan amennuγ, i wakken ad ḥerzen ansayen d yedles-nsen.

sγur: Muhabdiki