Ğğetaɣ ad nidir tafsut nneɣ

0

Acu yedran d iqbayliyen deg aggur n yebrir di tefsut n 80 ?
Acu yedran di tmurt n iqbayliyen deg ayyur n yebrir di tefsut taberkant ?…

Snat n tuttriwin agi wwint-d ad asent-id-naf tirirt, acku iqbayliyen ula d nutni
d aɣref am iɣerfan nniden. Agdud aqbeyli yecfa-d i tɣerma tamenzut n
tmazɣa. Si tsuta ɣer tayed ddren deg umennuɣ, kkren-d mgal inbazen i
d-yeffalen ɣer tmurt nsen, ggan lsas i tmetti nsen. Ma akken iffeɣ
ucengu arumi, aqbayli iɣil dayen kfan wuguren. Tagara tezzi taswiht
fell-asen : adabu yefka tesrih i yigen ad kecmen ɣer tmurt n iqbayliyen;
xedmen deg-sen I yexdem ufransis… d acu n sebba ? acku ilemziyen ffɣen-d
ɣer iberdan a d-seknen lɣid nsen ɣef uhbas n Dda Lmulud. Yettwagzem-as
webrid sɣur imsulta, sfehment d akken asarag ɣef tmedyazt taqburt ad
yawi arway i tmurt yebɣan talwit. Tilizri, amattaf, iɣmisen wwten ur
zgilen : ɣedlen-d tebrek ɣef iqbayliyen. Yir awal suzlen-t fell-asen :
wigi rran ad bdun tadukli n tmurt, d fransa i yellan deffir nsen…

Ass n 20 yebrir neɣlen-d imsulta ɣef tesdawit : xedmen axessar… wid ittnaɣen
ɣef teqbaylit nsen ččan yidan deg iksman nsen, sewwen-asen lgaz, ksen
sser fell-asen, tuget deg-sen ggran-d di lhebs, aqiri am azal am yid. Adabu
iɣil dayen yefra wurar: fran-t temsal n uqbayli, ur zrin ara acu I ten
yettrajun…

Seg 20 yebrir ar ass-a, 30 iseggasen I yezrin; yal aseggas
tettuɣal-d tefsut, tettawi-d yid-s asirem ara d-yerren tilelli I uqbayli.
20 yebrir 2001 tuɣal-d tefsut, mmugren-t iqbayliyen s idamen; asen I
d-tlul tefsut taberkant ! Tafsut taberkant d tanekra n ilemziyen mgal
tamhuqranit di tmurt n iqbayliyen. Suɣen- I tlelli, yerra-yasen-d rrsas,
nutni ifassen d ilmawen. 126 n temgaryad I yeɣlin d iseflan ! Ayen walan-t
wallen d wayen slan imezzuɣen d iwzi, mačči dayen ara d-yewsef umdan;
nɣan ula d aqcic n 14 iseggasen ! Seg-asen ar ass-a ulac I ybedlen: wa
nɣant, wa εeybent, wa urzent…

Ass-a, iqbayliyen ɣas ayen ak izrin fell-asen, ur gzimen ara layas, asirem nsen d akken amrar ad yeqqers, lqid ad irez, ad tefsi tallest yessirzigen tudert I iqbayliyen ad tifrir tagut ɣef tmurt n iqbayliyen, I waken ad idiren taqbaylit nsen, ad idiren tafsut
nsen !