Ǧǧet Aqbayli a d-yini awal-is

7

Nnan tamurt n yeqbayliyen iɣumi-tt usigna, tafat ur d-tḍal ɣef idurar i yeqbayliyen?! Aqbayli yenna: ɣas gezmen tazemmurt, a d-tger tara seg iẓuran a d-teǧǧuǧeg di tefsut.

Nnan, d ayen kfan igrawliwen, wid i d-yeqqimen, kra yuɣ-iten udabu s yedrimen, wiyaḍ ttazalen zdeffir n weɣrum?! Aqbayli yenna: Ǧerǧer ad yessiwel i wedrar n Ukeffadu, agdud aqbayli a d-iserreḥ am lebreq !

Nnan tamurt n yeqbayliyen texla, ur teseččay aɣrum, ur tezmir ad tili d tamurt?! Aqbayli yenna: deg imi wuccay ur yettsemmiḥ, tarwa n weqbayli ad takki si tnafa, s idammen-is yemmaren, a d-teḥyu tmurt !

Nnan, iqbayliyen yeṭṭafari-ten lḥebs d rrṣaṣ, am akken yura deg uqerruy n Uqbayli umennuɣ?! Aqbayli yenna: tudert akk d amennuɣ, win ur nettnaɣ ur yettili !

Nnan, tutlayt n teqbaylit teggugem, ad tenger?! Aqbayli yenna: taqbaylit d tutlayt n wegdud , armi i ttyecrew merriɣet i tt-id-yekkes seg tuccar n udabu. Tameslayt-agi-nneɣ, n-lul-d yis, nedder yis, a nemmet yis.