Ɣur-wat … ɣur-wat !!

1
tighri
tighri

TAMURT – Nebɣa ad d-nger tiɣri i yimezdaɣ n Bgayet akked yimezdaɣ n tmurt n Leqbayel i wakken ad ɛassen iman-nsen uqbel ad ten-yawi nnger. Aṭas i d-issawalen i warrac-nneɣ d yilmeẓyen-nneɣ ad ffɣen s iberdan ass n 22 di Fuṛaṛ 2019 bac ad bedden mgal tis 5 n Butef. D imdanen ur nettwassen ara, zuzuren-d tiɣra-nsen deg Facebook mebla ma neẓṛa anwa-ten.

Tamurt n Leqbayel si zik i tettwajreḥ. Mazal imeṭṭi ur yekkaw ara f leḥnak n tyemmatin-nneɣ seg ayen i yeḍṛan yid-nneɣ aṭas-aya; yerna mačči d Leqbayel kan ara yettmettaten f tmurt Lezzayer.
Anda-ten Yizzayriyen deg iseggasen 1954-1962 asmi i ttnaɣen Leqbayel mgal tamurt n Fransa?
Anda i llan wiyaḍ deg useggas n 1963 asmi d-tekker tmurt n Leqbayel mgal tarbaɛt-nni n lḥukkam i d-yusan si Wejda?
Anda-ten wiyaḍ asmi tekker di 1980? Neɣ ahat tamaziɣt-nni d Leqbayel kan ara yemten fell-as?

Anda-ten Yizzayriyen deg useggas 2001? Neɣ imir-nni fkan-as tayett i Butef i yenɣan azal n 130 d amdan di tmurt n Leqbayel?
Ayen akk i tenneɛtab tmurt n Leqbayel f wiyaḍ, iṣaḥ-itt ala nnger d qeḍṛan i taggara. Wissen ma yella akka ara tkemmel : Leqbayel ad ttneɛtaben, ma d wiyaḍ ad ttɣelliten?
Ur d-iqqim ara tura umennuɣ ur d-ngellu ara s leṣlaḥ i tmurt taqbaylit akked wegdud-is. Yal yiwen yeqqim deg uxxam-is ass n 22 di Fuṛaṛ, ad inezzeh kan si lebɛid ayen iḍeṛṛun di tmurt taǧaṛett.

Yeggra-d kan umennuɣ f tmurt taqbaylit, f leṣlaḥ n wegdud aqbayli, f yidles n wegdud aqbayli akked tutlayt-ines. Ayen-nniḍen yexḍa Iqbayliyen.

Amaziɣ Aweɣlis