19 Meɣres 1962 yesserwel acengu n berra, iberreḥ-d s ucengu n wexxam

13

Asurif i d-lḥan izzayriyen si 19 Meɣres 1962 ar ass-a ɣer
deffir i ten-yewwi. Asurif i d-yedda wegdud yerna-yas-d takmamt,
yegla-yas-d s usegres ɣef yimawen alarmi yeɣli di tcerket n At udabu.
Asirem-nni ɣef yennuɣ wegdud 07 n iseggasen iɣezzfanen, nɣan-t wat
udabu.

Agdud iqubel acengu n berra, yuɣal deg wemḍiq-is ucengu n at wexxam.
Yessenta tuccar, ur inegger anagar ma yekker uɣebbar.

Abrid uɣen at udabu si 1962 ar ass-a yewwi tamurt ɣer wesyax. At udabu
glan s wegdud yettamnen yis-sen, sukken-t deg tezribt n yir tasertit.
Agdud yedder deg usirem, mazal yettraju melmi ar at‑beddel, melmi ar at‑seggem. Adabu yal ass yettṛeggim aseggem di liḥala n tudert i wegdud
maca d awal kan. Yal aḥkim ara d-ibedden d acebbeḥ deg imeslayen i
d-yettawi yid-s. Am win iruḥen am win i d-yussan. Anagraw (nniḍam) d
yiwen. At udabu sserwan-as awal i wegdud, rwin-as aqerruy-is, ččuren-as
aɛellaw-is.

Yuɣal wegdud iɣellet s wannuz, ittnuz s wawal, yettwarhan s wedrim.
Tuɣal tmurt am tin ur nesɛi imawlan. Tetteddu s tuffra. Wa yettu
tamurt, wa tettu-t tmurt, wayeḍ yeɣli deg tesraft n tatut.

At udabu refden srusun, ttawin ttarran, ttsawan, steqsayen, alarmi wa
kksen-t, wa rran-t-id.
Amek ara yidir wegdud d ilelli di tmurt anda ulac tilelli?
At udabu ugin ad nadin ɣef iẓuran n tmurt, ad lemden amezruy-is, seg
Yugurten alarmi d Ɛebban.

Amer d lebɣi ay ul, At udabu ad ssutren tuttriwin-agi: Anda-tt
tugdut? Anda-tt tlelli? Anda-t Uwanek n izerfan? Anda-tt
tmendawt?

At udabu skanayen-d tisebbiwin-nsen, ttawin-d tiqdimin-nsen, ass-a,
banent anda ttarrant. Wid yenwan s ubeddel n zdaxel n unagraw neɣ s
ubeddel n wudmawen ara tefru yewweḍ-d wass-nnsen.
Yak yir aseklu ur yettleqqim, yir adabu hḍer neɣ qqim.
Ass-a, yessefk ɣef wegdud ad ifaṛeṣ tagnit, ad yezḍem deg webrid
yessufuɣen, ɣas ẓayet teɛkemt, maca ad tifsus tudert.