Obama: aseggas tura.

0
239

Azal n leḥmala n Barack Obama ɣer Imarikaniyen yuɣal ɣer 50% kan akken i t-id-yenna usundaj n Gallup, neɣ 46% ɣef wakken t-id yenna umaṭṭaf CBS. Γef waṭas n tlufa, aṭas n medden i yebdan ttcukkun deg tezmert-is i wakken ad ibeddel liḥala i ttidiren. Ula ɣef temsal n wassaɣen ger yimdanen d iẓuran-nsen, tuget n Imarikaniyen nnan belli ibeddi n Barack Obama deg Uxxam Amellal ur d-yewwi kra d amaynut, ur ibeddel kra.

Urfan n Yimarikaniyen iban-d akken i iwata iḍelli n tlata deg tefranin timezwura i d-yeḍran deg temnaṭ n Massachusetts. Imagdayen (idis n Obama) xesren amḍiq n uεeggal n umni mucaεen Ted Kennedy. I t-yewwin d agdudan (idis axṣim).

“Imdanen ɣilen-as ileḥḥu sufella n waman, am Σisa, maca netta d amdan daya, d aselway dɣa tefra tfuk.” i d-yenna yiwen seg Uxxam Amellal.
Ma yella dduklen yemdanen ussan imezwura ɣef ufran n Obama, yal yiwen d acu i yefren. Tama tazelmaṭ ass-a tenna yestehza aṭas deg useggem n uḥric n tezmert d isenfaren nniḍen n tmetti, am umennuɣ ɣef izerfan iεeṭṭayen. Ilemmasen ilelliyen (Centristes) xelεen deg tedrimt i iṣerref.

Barack ur s-εeǧǧben ara aṭas imeslayen-a. Ass-nni n letnayen, deg tejmilt i yerra i Martin Luther King, yewwet-d s wawal tama tazelmaṭ, yenna belli “isurifen am wid meqqren neɣ wid mecṭuḥen yessefk ad yesteεref yiwen yes-sen, acku i sin d tilki ɣer zdat”. Akken daɣen yesteεref belli ur yessaweḍ ara ad yesdukkel akk isertanen imarikaniyen. Leḥzen n Obama meqqer akken i meqqret lakriz tadamsant i tettidir Marikan d cummaj yulin ussan-a. Ahat d ayen i s-d-yesneqsen deg cciεa-ines?!

Ma d tasertit-is taberranit daɣen ur telli ara d tin i d-yewwin aṭas. Tazwara imdanen mugren-t-id am winna ara ten-id-icefεen. Maca Barack yufa-d aṭas iɣeblan deg wannar-a. Tasertit-is teldi-d ul-is i yak timura, seg tmurt n Ccinwa ɣer tmura tinselmin, εeddi-d seg Rrus akked Marikan n Wadda. Maca taɣennant n Iran, tiwuɣa n Pakistan akked d tiyyitiwin i s-undin irebraben i Marikan tesduqqes-d Obama seg targit-is, smektan-t-id belli awal aẓiḍan deg tsertit ur d-yettawi ara dima igemmaḍ i nettraǧu, ɣas akken yessefk ad yili.

Obama yefren abrid n leεqel deg ussan-a n lakriz. Maca amaḍal ur yezgi ara d win isebbren..