Ernesto Guevara, win iwumi qqaren Che Guevara, yekker-d deg yiwet n twacult tamerkantit n tmurt n Arjuntin. Imi yessaweḍ 02 iseggasen, yuḍen buneggaf. Aṭṭan-a yeɣleb-it s waddal i ixeddem s waṭas, ayen i s-yefkan tafekka teǧhed. Yella yesεedday-d daɣen tuget n wakud-is s tɣuri n yedlisen, am yemma-s. Imi yessawweḍ 20 iseggasen, yekcem ɣer tesdawit i wakken ad iɣer tujjya. Dacu kan, ur iεeṭṭel ara yeffeɣ-d syinna. Iruḥ ad yexdem deg yiwen n sbiṭar n yinejdamen. Maca ur yeqqim ara aṭas. Ger 1951 d 1953, yunag snat tikwal deg Marikan Wadda, anda i yemlal d waṭas n tɣermiwin d yidelsan. Iwala daɣen lmizirya d leḥzen ɣef udmawen n yimdanen. Deg ubrid-is ger tmura n Marikan Wadda, tasertit tebda tkeččem-it. Tikta tigrawliyin d tid n Karl Marx uɣalent zedɣent-as allaɣ-is. Abeεda, asmi akken i yewweḍ ɣer tmurt n Guatemala, anda Jacob Arbenz Guzman aked udabu-ines imgerrez sseɣlin-ten Imarikaniyen. Asmi yunag Che Guevara ɣer Meksik, deg useggas n 1956, yemlal d Fidel Castro, i yellan imir-nni d abugaṭu ilemẓi. Uɣalen d imdukal. Syinna msefhamen deg sin yid-sen, kecmen-d s 80 n yirgazen ɣer tegzirt n Kuba. Tagrawla tendeh. Deg yennayer 1959, ssawḍen beddlen adabu. Guevara yeṭṭef aṭas imukan iεlayanen deg unabaḍ amaynut n Kuba. Yella d netta i d aqerruy yettxemmimen. Yella qessiḥ daɣen d yirgazen n udabu aqdim, yella wid yenɣa netta s ufus-is. Maca ur iεeṭṭel ara, yeǧǧa adabu deg tuber 1965. Imdanen yakk wehmen deg-s. Netta yebɣa ad yeẓẓu tanemla, s udem-is akubi, deg umaḍal. Deg tazwara, nnan-d yeffer. Netta aziɣen yella yettheyyi-d iman-is i wakken ad yuɣal ɣer tegrawla. Ixdem-itt deg snat n Tmura. Tamezwarut deg Kungu. Tis-snat deg tmurt n Bulivi. Amennuɣ-is ur yeffiɣ ara. Deg 1967, tawenza tewweḍ-d. S ufus n yiɣallen n CIA, lεesker abulivi yeṭṭef-it-id deg yiwen umadaɣ, tekkan-as dinna.
Che, ass-a, yuɣal d azamul n tegrawla takubit akked mgal-tamnukda. Isem-is yettwura s ureɣ deg umezruy n tmiḍi tis-20. Γas ulac-it yella.
{{Kra seg wayen i d-yenna:}}
– Deg tegrawla, yessefk ad nerbeḥ neɣ ad nemmet.
– Izmiret dima ad teḥḥulfum deg ulawen-nwen s kra yellan d azugli i d-yeɣlin ɣef kra n umdan, win yebɣu yilit, anda yebɣu yili deg umaḍal. D aya kan i d-yeskanen agrawli igerrzen.
– Yessefk ad niqsiḥ melba taɣert n wul.
