Amagrad ɣef umezruy n Imaziɣen – Kra seg tmeddurt n Yimaziɣen send ad d-kecmen Waɛraben

Irumanen (les Romains), d nutni i d imnekcamen imezwura n tidet ɣer Tferka-n-Ugafa, segmi i teɣli Karṭaj. Deg useggas n 146 send-Ɛisa, Irumanen rran akal i ṭṭfen Yifniqen (les Phénicines) d ayla-nsen.

Deg tudert n Masensen, Irumanen ttqadaren Tamurt n Numidya. Asmi yemmut, ttqelliben ad rẓen tadukli yellan deg tgelda-ines ; ssaramen ad sfeclen udabu-ines iwakken ad rnun ad ssiherwen akal-nsen.

Jugurten, i irefden amedya seg jeddi-s Masensen, yebda yesdukkul Numidya, yessimɣur akal-is, deg nneqmat n Yirumanen. D netta i d argaz amezwaru ara yennaɣen mgal-nsen, acku yesɛa tazmert d tḥerci tameqqrant. Maca, ɣer taggara, iwexxed-it uḍeggal-is Buxus ; yettwaṭṭef, dɣa wwin-t Yirumanen ɣer Ruma, din i yemmut.

Amennuɣ n Yimaziɣen mgal Irumanen ur yeḥbis ara, ɣas akken yemmut Yugurten. Aṭas n yigelliden-nniḍen i d-yekkren nnuɣen, am Yuba-I d Yuba-II, Takfarinas, Firmus (372-376), Jildun (398), d umussu iwimi qqaren : « les Circoncellions 1 ».

D acu-tent tmental yeǧǧan Imaziɣen ad ttnaɣen dima ?

Gar tmental yellan, nezmer ad naf snat d tigejdanin :

1) ad d-rren akal-nsen, i asen-kksen Irumanen ;

2) ugin tilin n Yirumanen deg Tmazɣa.

Iswi n Yimaziɣen deg waya, ran, deg tazwara ad d-rren Karṭaj ; tis-snat ad sdukklen Tamazɣa.

Idunatiyen2 ffɣen-d mgal n Yirumanen deg tasut tis-3, aya yegla-d s yiwen n ccwal d ameqqran deg Tgelda n Rrum. Mi d-kkren Yirumanen ad nnaɣen mgal n Yidunatiyen, d ayen i d-yessekren lɣiḍ n « les Circoncellions ». Amussu n « les Circoncellions » d imekrazen imaziɣen yettekkin ɣer umussu n Yidunatiyen, sekren-d amennuɣ d ameqqran mgal n Yirumanen.

Amussu-ya (« les Circoncellions ») yettimɣur, yettimɣur armi d-yesker lḥir n ugellid Kunstuntin ; iger-d iman-is iwakken ad ten-yeḥbes. Yebda yettceyyiɛ-asen imazanen iwakken ad ẓren acḥal n yigellilen i yellan akken ad sen-yefk idrimen. Maca, iselmaden idunatiyen sḥercen-d imdanen-nni n « les Circoncellions », yuɣal ugin tallelt (aide) i sen-d-yefka ugellid. Syin akin, agellid Kunstuntin yesdukkel taklizt (église) tadunatit akked tin yellan deg udabu. Maca, agdud yugi ad yeqbel tadukli yid-s. Ar taggara, d tagrawla. Igen n « les Circoncellions » yettwaɣleb sɣur Yirumaniyen, yeɣli deg Bagay (ass-a : Qṣer-Bagay deg Wawras). Irumaniyen kecmen ɣer uɣaram-nni nɣan aṭas n yimdanen, widak i yeddan d tama n « les Circoncellions ».

Segmi kfant tedyanin-a, yella-d uḥebbus ɣef yimenɣi kra n wakud kan. Ama d Idunatiyen naɣ d « les Circoncellions » ur ifukk ara yisem-nsen. Yekker-d Jildun deg useggas n 398, yennuɣ i tseglut (au bénéfice) n « les Circoncellions ». Yennuɣ mgal n Yirumanen, yekkes-asen-d aṭas n wakal, yefka-t i « les Circoncellions ».

Mi d-wwḍen Yiwendalen (les Vandales) deg useggas n 429, drus maḍi n wakal i sen-d-yeqqimen i Yirumanen, anagar kra n yiɣaramen i d-yezgan ɣer tama n yillel agrakal.

Iwendalen ffɣen tamurt deg useggas n 533. D Ibiẓantiyen i ten-yessufɣen. Maca, Ibiẓantiyen ur qqimen ara aṭas n wakud deg Tferka-n-Ugafa. Mi yemmut ugellid-nsen Justinya, deg useggas n 565, Imaziɣen ṭṭfen amur ameqqran n Tmazɣa, rran-d akk akal-nsen i sen-yettwaṭṭfen.

{{Sɣur : R. Awal}}

[[MW. :

1 Awal « les circoncellions » yekka-d seg tlaṭinit « Cellas », anamek n wawal-a « widak i ittezzin i wakal-nsen, naɣ widak yettɛassan ɣef wakal-nsen ».

2 Idunatiyen (les Donatistes), kkan-d seg umezwaru-nsen iwimi qqaren Dunat (Saint Donat). Amussu n Yidunatiyen d yiwen n umussu yugin ad ilin Yirumanen deg Tmazɣa, yeffeɣ-d mgal ageldun Sizar. Lulen-d deg tmurt n Ṭṭelyan.]]