Tilelli ur tesɛi tilisa – Abrid n Ikurdiyen ɣer tmanit

Di rreḥba tagraɣlant n yedlisen n Frankfurt am Main di Lalman (2010) ttwafessren idlisen si 110 n tmura. Ma d idlisen s tmaziɣt ulac.

Deg wexxam uṭṭun 5 dinna llant teẓrigin n waṭas n tmura. Gar-asent yella unbaḍ adigan akurdi (Lɛiraq). Deg waxxam-a n yedlisen n tmurt n Kurdistan yella yura wannect-a:

“Ministry of Culture Kurdistan Regional Governmet”.

Agemmaḍ n wexxam-a yella wexxam n unabaḍ afidiral n Lɛiraq.

Ihi ɣas Kurdistan d yiwet n “tqernit” di tmurt n Lɛiraq, maca ɣur-s amḍiq-is gar n tmura n ddunit.
Dinna, mmeslayeg d yiwen Ukurdi ɣef tmurt-is:

{{Tamurt : Azul fell-awen. Yella yiwen deg-wen yettmeslayen talmant? Nekk d amaziɣ si tmurt n Tmazɣa.}}

Ikurdiyen ssusmen, yuɣal yenna yiwen deg-sen s tkurdit, Imaziɣen.

Dɣa ḥulfeɣ, mi slan annect-a am akken nnecraḥen wulawen-nsnen.

Yiwen Ukurdi : Ih, nekk ttmeslayeɣ talmant.

Dɣa yewwi-yi-d kra n yedlisen ɣef tmurt-nsen.

{{Tamurt : Tanemmirt! Riɣ ad mmeslayeɣ yid-k ɣef tmurt-nwen deg weḥric n tsertit.}}

Netta : Aha.

{{Tamurt : Amenk i tessawḍem tesbededem timanit i tmurt-nwen mgal anabaḍ aɛiraqi ?}}

Netta : Tamurt-nneɣ “Kurdistan” ala nettat i yesɛan timanit di tmurt n Lɛiraq, acku nekni nennuɣ fell-as. Seg useggas n 1961 almi d 1970 d nekni d imenɣi mgal Araben, almi nessaweḍ nesbedd timanit aseggas n 1970. Fell-as mmuten aṭas n ukurdiyen.

Aseggas n 1975 Sedddam Ḥusin izdem-d fell-aɣ yesseɣli timanit-nneɣ.

D acu kan nekni ur nrebbex ara iɣallen-nneɣ.

Aseggas n 1991 di lgirra mgal Lɛiraq nessaweḍ nesbedd tikkelt nniḍen timanit i tmurt-nneɣ. Imarikaniyen fkan-aɣ-d afus.

1992 Amni akurdi yemsefham d unabaḍ aɛiraqi , tamurt n Lɛiraq ad tuɣal d tamurt tafidiralit.

Aseggas 2003 segmi yettwakkes S. Ḥusin tamurt n Lɛiraq tuɣal d tamurt tafidiaralit.

{{Tamurt : Ih, kunwi tennuɣ ɣef tmanit i tmurt-nwen temmutem fell-as. Nekni s Yezwawen (Imaziɣen) ur nri ara lgirra, ur nri ara ad nehmet ɣef tmanit.}}

Netta : Ih, d ayen yelhan. Amezruy-nneɣ akka i yedda. Kurwi fitḥel ma tennuɣem s udebbuz. Yella webrid nniḍen, arid n tsertit.

{{Tamurt : I tutlayt-nwen takurdit d tutlayt tunṣibt di tmurt n Lɛiraq ?}}

Netta : Ih, d tutlayt tunṣibt di tmurt n Lɛiraq merra. Kra yellan yettaru-t unabaḍ aɛiraqi afidiral s taɛrabt, s tkurdit akkd teglizit. Annec-a yella ɣef „lpaspur“-inu.

{{Tamurt : Atan tettarum tutlayt-nwen „takurdit“ s isekkilen n taɛrabt, amen akka ?}}

Netta : Llan imusnawen n tutlayt-nneɣ akkd waṭas n ukurdiyen

i yeqqaren yessefk a nanu tutlayt-nneɣ s isekkilen nniḍen.

D acu kan mazal ur teḍri ara taluft-a.

{{Tamurt : Awal aneggaru. Timanit i tmurt-nwen tegla-d s tlelli I tarwa n tmurt-nwen ?}}

Netta yeclex s taḍsa yuɣal yenna : Tilelli ur tesɛi tilisa. Abrid-nneɣ ɣef tlelli mazal ad ikemmel tikli !

{{Tamurt : Tanemmirt.}}