Si tedyant i yeḍran deg usseggas 1949 ar ass-a tamurt n Lzzayer mazal-itt t-ttedu s leɣlaḍ, s ukelex d tkerkas. Assen i d iban wubrid ara tawi, abrid n taɛrabt-tineslemt, abrid yerran izzayriyen n tidett ɣer deffir. Assen i d ttefran, id tt-gezmen di rray belli “tamurt n lzzayer d taɛrabt-tineslemt, ur telli ur tettili d ayen neɣ akken nniḍen.”. Seg wasseni i neqqen sekra n win id yezgan deg webrid agi, sekra n win yettnadin ɣef tidett, d win ak yugin tikellax d leɣlaḍ.
Ur ǧǧin tamurt, yal amḍiq iwḍen-t, anga yeres uḍar-nsen tluɣ. Zgan ttcetkin, snen ala ilhem s yes-s i d-ttawin ayen i yebɣan. Ɣur-sen sɛan lḥeq ɣas ma yella ḍelmen, win ara ten-isḍelmen ar d at-ččen.
Aqendur acebḥan yuɣalen d aberkan seg ilefḍan, inezḍan iɛreq-asen-d ubrid s wudmawen-nsen, deg uččamar-nsen yeckenteḍ dɣel, ɣer-s i sefḍen lexdayem-nsen, d texnanasin-nsen, tid ur yezmir ula d ciṭṭan ad tent-ixdem. Tacacit ɣef uqaru ammer ahat ad t-id-qsed yiwwas tmusni!
Wid i t-iɣunfan, ɣilen ad nɣen tikta-ines, ad nɣen asirem di tmurt n yeqbayliyen. Ass-a nettwali d akken ɣelḍen, imi tikta Uqbayli-nni a ten-ttan garaneɣ nettḥarab fell-asent; d abrid-is kan i neḍfer imi d abrid yessufuɣen, yettawin ɣer Teqbaylit.
Amennuɣ n Weqbayli-nni d amennuɣ n tikta deg wennar n leqder, d amennuɣ n tlelli d tugdut akked d izerfan n wemdan.
Limmer dɣa d tidett tettnadim ɣef lḥeq ur yelli d ayen iwaɛren. Limmer d tidett tettnadim ɣef ṣwab ur yelli dayen iɛerqen. Limmer dɣa d tidett tettnadim ɣef tugdut, d ayen iwen-illan deg idles.
- I wakken a nessiweḍ kra n wass ɣer tlelli,
- yessefk a necrew tidi fell-as iḍ d wass.
- Ma nessaweḍ kra n wass ɣer tlelli,
- ass-nni a nẓer m’anezmer a nissin tilisa-s.
Yal mi ara d-yaweḍ 8 Meɣres, tezga tmeṭṭut ɣef yilsawen ladɣa di tmurt n Yiqbayliyen anda mazal tinzar d trugza ttalint-d seg useḥnunef n udabu yettcebbiḥen tameṭṭut Tazzayrit deg tiliẓri tilemt amzun akken d aεeqqar i s-yettak akken ad tgen aseggas d tirni.