Di 8 Tuber 1988 krent tmesbaniyin di lezzayer tamanaɣt, adabu n Cadli yesmar lbarud ɣef wegdud melba ceḥḥa, di tmurt n iqbayliyen urɛad slin lɣaci s wayen iḍran di lezzayer, d ibzizen n isallen kan iten-id-yettawḍen sya ɣer da. Ɣef aya inelmaden n tseddawit Lmulud At Mɛemar, nejmaɛen ass n Lḥed 8 tuber 1988 tameddit, akken ad tili tamurt n iqbayliyen deg umussu i d-yekren di lezzayer, acku aṭas n inelmaden iqbayliyen yekkin di tmesbaniyin-agi i yellan di tmanaɣt, sawḍen-d isallen n tmettant n waṭas n yelmeẓyen.
Seg unejmuɛ-nni, inelmaden sufɣen-d yiwen n wulɣu i d-yewwten s leqseḥ deg udabu n FLN, yessawal daɣen ɣer tlilit s idis n imesbaniyen n lezzayer. Ulɣu agi bɣan ad t-ferqen di tmurt n iqbayliyen akken ad d-rren tiɣri i tin i d-yusan si tmanaɣt.
Fernen-d sin n inelmaden i wakken ad ruḥen ad awin ulɣu agi ad t-ferqen. Di tazwara, di temdinin n Larbaɛa Nat Yiraten (L.N.Y) akwed Micli (sin agi inelmaden d Masin Ferkal akwed Mehdi Siam).
Fɣen-d si tseddawit ufan-d mass Maɛtub Lwennas yellan imiren d yiwen ger icennayen imḥaddiyen imeqranen di tmurt n iqbayliyen. Nnan-as ma yezmer ad ten-yessiweḍ ɣer L .N .Y akwed Micli, yeqbel ad ten-yessiweḍ, imi ayagi d tamsalt n nnif. Mass Maɛṭub, deg 4×4-ines, yesuter-asen kan yiwet n tɣawsa, yenna-yasen: “Ɣert-iyi-d ulɣu akken ad sɛuɣ tikti ɣef ayen yellan deg-s”.
Ɣran-as-t-id! Dɣa yenna-y-asen: “ fket-iyi-d merra ulɣuten yellan ger ifassen-nwen, ur ttaǧat ula d yiwen ɣur-wen! Akka ma yella kra ḥebsen-aɣ deg webrid, d nek i ɣef ara ad d-yuɣal llum mačči fell-awen. Acku nek zemreɣ ad d-selkeɣ iman-iw s yisem-iw d acennay, ma d kunwi ad yiwɛir fell-awen. Yerna ma yella kra gezmen-aɣ-d abrid imsaltiyen, init-d belli deg webrid kan i d-ḥebseɣ ɣur-wen, teddam-d yidi d imsebriden! »
Am akken is-icar Mass Maɛtub i teḍra yid-sen deg webrid. Ferqen ulɣu-nni di L.N.Y, imiren ṭfen abrid-nsen ɣer Micli, dɣa walan iǧadarmiyen ɣer sdat ad d-leḥḥun s Land Rover-nsen, seg waken tella yiwet n R4 zdat n tkarrust n Maɛtub, iǧadarmiyen ur zmiren ara ad asen-gezmen abrid, ǧan-ten ɛeddan maɛna din din dewren-d, ḍefren-ten-id s deffir, dɣa di lawan-nni Mass Maɛtub yettɣawal akken ad yaweḍ ɣer Micli uqbel ad ten-ṭfen. Seg wakken id d-heggan iman-nsen ad ten-id-wten s rṣas si ṭṭaq, Mass Masin yenna-yas i Maɛtub :“Ilaq ad neḥbes a Lwennas, hatenah sufɣen-d kalachnikov-nsen si ṭṭaq.” Dɣa yeḥbes Lwennas.
Sersen-ten-id di tlata yid-sen si tkarrust, ifassen-nsen ɣef iqerrya-nsen. Dɣa Maɛtub yuẓ ɣer uǧadermi-nni yellan zdat-s akken ad as-yini s leɛeqel, acuɣer i bɣan ad ten-ḥebsen, yiwen deg iǧadermiyen-nni idegger-it-id s tdebbuzt-is yenna-y-as ad yali ɣer tkarrust-nsen. Masin akwed Mehdi di lawan-nni ssulin-ten ɣer daxel n Land Rover-nsen. Mass Maɛtub, seg wakken iwala ulac amsefham yid-sen, yuɣal ɣer deffir akken ad yali ɣer Land Rover-nni ula d netta, yiwen seg iǧadermiyen-nni irfed-d akalachnikov-ines yesmar fell-as 5 terṣasin xas akken mazal ifassen-is ɣef uqaru-y-is. Skerkeren-t ɣer daxel n tkarrust-nsen bran-as. Maɛtub yeɣli ger iḍaren n Masin, tafekka-s tettiqi d idim.
S lɣerḍ-nsen, iǧadermiyen-nni, cudden Masin akwed Mehdi s tɣumdin, ma d Maɛtub seg wakken lqayet tyita yuɣ, yeqqim di lqaɛa yettrejrij. Imi walan Maɛtub inezef, uɣalen wwin-ten ɣer sbitar n Micli. Mi iwḍen ɣer daxel n sbitar, iǧadermiyen-nni rsen-d s laɛqel-nsen, ruḥen ɣer tfekka n Maɛtub skerkeren-tt-id ɣer berra, dɣa yussa-d umejjay akken ad iwali tawaɣit yuɣen Maɛtub dɣa yenna-yas s taɛrabt uǧadermi-nni “{{ Rfed rebb-u, xellih imut, lkelb!”}}.
Maɛtub yeqqim di sbitar n Micli, Masin akwed Mehdi bwin-ten iǧadermiyen-nni ɣer lkazirna-nsen, imiren ɣer tin n lezzayer tamanaɣt. Aǧadermi-nni i t-yewten ur iɛedda di creɛ ar ass-a n wussan, d abeddel kan id as-bedlen amḍiq n uxeddim!
Akka i d Lezzayer n Cadli, n Nezzar, n Bumedyen d Buteflika…! D wigi akwed waṭas nniḍen is-yefkan i tmurt tiyita swayes ur tettnejbar ! D acu kan amezruy yezga-d d anagi, d netta ara ten-iḥasben…
Sɣur: Muccen.
