Laṣel ass-mi id-yesteqsa, azzayri yeḍḥa-d yefcel, allaɣ-is yebezwez si tadezt n ddin, yuɣal-as weɛjar yerna yettzuxu yes-s. Tamusni ass-mi akken id-nuda fell-as tufa-t-id yezder di targit n ddin, yeṭṭef-it bubarak seg učamar-is yegguma ad as-yebru. Ar melmi ad d-yendekwi? Ar melmi tafat?
Yeffeɣ useggas, ad yekcem wayeḍnin. Deg-wayen yezrin, ad d-nelmed ad d-nissin, ad d-nagem timsirin, ad nesfeḍ tucḍiwin : Aɣref ur neddukel d amuḍin, d nger i t-yeggunin.
Am yal aseggas igduden imaziɣen ttebddaden i wesfuggel n umenzu n usseggas Amaziɣ. Yal tamnaḍt d acu n wansay s wamek i d-yettili usfugel-agi. Anect-a yemgared si tama ɣer tayeḍ.
Tiftilin myal ṣṣifa cɛecɛent di yal tiɣmert seg unaffag. Annar n unaffag yettɛummu si lɣaci. D aɣemɣum id d-yenneɣlen fella-s, tiwwura akk ssurugent-d, ad d-ttasen si yal tamurt. Ad as-tiniḍ d taɣrast n tzizwa seg akken wa ikeččem wa iteffeɣ...
Dayen yecban lekdeb i d-yersen di medden; llebsat mkul ṣenf, tutlayin mxalafent, kul wa ansi id d-yusa, yal wa tudert-is d taqṣiṭ, yal wa d acu n teqṣit id d-yurar di ddunit...
Aqbayli aseggas-agi amaynut ad yewwet amek ara yesemlil atmaten-is, ad myaɛqalen, ad mlilen ɣef yiwen n yeswi, xas yal wa ad yewwet s wayen yezmer, s wayen yufa, ad yawi abrid yebɣa, awi-d kan ad tili tifrat-is d timlilit ɣer yiswi (Taqbaylit), ara d-yekken nnig tagut i s-iɣ-tdel yir tasertit.
