Tadyant n Mhend u Bujemaɛa (III)

1
1167
Tadyant n Mḥend
Tadyant n Mḥend

TAMURT – Taher ikemmel abrid-is, isegwra-yasen : Aεti-kwen saḥḥa ! Axxam n Ccix Aεli yussa-d ddaw lǧamaε n Sidi Aεmer u Fayed. Tikwal m’ara ttqessiren di tejmaεt sellen-asen-id deg uxxam n Ccix, d netta isen-id yennan yal tikelt akka m’ara mlilen yid-s, inna-yasen : “mara t heddrem a tarwa, ar ticki ilḥa yiḍ, ttemmeslayet kan s ttawil akken ur ken-id nsel ara deg uxxam”.

Taher, atan i sṭebṭeb ɣef tewwurt n berra, isla iffeγ-d γer-s yiwen, dγa tenṭeq-d taγect n tmeṭṭut, tenna : Anwa wagi ?
Taher : A d nekk a Nna Werdiya, d Taher…, mmi-s n Saεd n Aεli u Meẓyan seg Yiγil ! Tameṭṭut n Ccix telli-d tawwurt, dγa mlalen wudmawen-nsen ttikelt tamenzut udem n Taher d Werdiya n Uxemcan, tameṭṭut n Ccix. Nettat, tezga teḥjeb, acku t-tamrabeḍt alarmi i « tuγ fell-as tili », mačči t tteffeγ seg uxxam ass kammel. Teḥjeb kan ar beṛṛa, wammag ayen din i d-ittasen n yemdanen yal ass ad zuren argaz-is; wa ɣef waṭṭan akka am Taher, wa ɣef dderya, ma tameṭṭut ur tessidir ara neγ akken ad sεu aqcic i lewrata n wedrum. Yal wa lḥasun d acu-it-id ittawin. Werdiya si taddart n At-Sidi-Yeḥya, akin i ugemmaḍ, “wid it gallan s milbiεa” ; teqbebbi am tzerbuḍṭ, tuzert d tesḥḥi u ternay-as tewzel. Di laεmr-is lewhi n xemsa u tlatin, maca meẓẓiyet aṭṭas γef urgaz-is, maεna imi d Ccix n taddart, tamεict n ṛaḥḥa d weɣrum n ssmid yal ass, tameṭṭut teqbel xas argaz yugar-itt di laεmer. Acuγer ayagi ? Acku, tameṭṭut taqbaylit, qlil-it t-id ig xeddemen, ma ur tezwiǧ ara, ad teqqim « ddaw uḍar » n tlawin n watmaten n wuxxam-nsen neγ εadik ma yella d yell-is n takna…

Werdiya n At Sidi Yeḥya, tenna :
Mreḥba yiss-k, d kečč id d Taher ?!
Taher : Mselxir fella-wen ! D nekk, anεam ih…!
Tezwar zzat-s netta yetbeε-itt deffir. Akken iwweḍ Taher ar umnar yenna daγen Taher : Mselxir fell-awen,
Ccix Aεli : Mselxir lεafya a mmi !…Kecem-d !

Taher yekcem ibedd i tlemmast n tzeqqa ittmuqul Ccix i qublen aqejmur di lkanun lla yettenfufud yerna yesduxxun, yerna kra n zrureq n tmess i d-ittḍillin deg uruzen ig gan deg-s. Taher yewweḍ akken kan kksen iqeslen n wučči, dγa, Lla Werdiya nat Sidi Yeḥya (akken s qqaren at tefrawt) t sukk fell-as aεaruḍ ɣef imensi. Ayagi yak d lqanun n trebga sγur Iqbayliyen sumata; yal amdan ara irzun γef wayeḍ lawan n tuččit, labud ad isuk ɣef umdan nni ulamma d aεaruḍ fell-as.

Taher : A γesbeγ a nεam a Ccix, kker kan an sahel s tγawalit !
Ccix Aεli : Ayen akka tγesbeḍ ?!
Taher : Dda Mḥend u Bujemaεa ig-γlin seg-aṭṭan tameddit agi ur kun aεniɣ, ttameṭṭut-is i yi d-iceyεen akken a ttedduḍ ar wexxam. Lla Werdiya Iεamrucen tenna :-Arjut tura meqqar a ttεarḍeḍ ula d afenjal lqahwa imir truḥem (tennum tettεaraḍ medden acku akka i d lεadda n zik). Taher : -Mdah a Nna Werdiya, aqlaγ neγseb, argaz atan lla itesga yuḍen, yettraju Ccix… ar tikelt nniḍen ma irad uxellaq, yak mazal ussan ncallah !
Ccix Aεli inna ula d netta: -Tesεiḍ lḥeq a Taher a mmi, ar tikelt niḍen di lehna, awi-d abernus-iw a tameṭṭut ! Werdiya : -Akkan i-wen yehwa…! Terra, teddem-d abernus yersen af ucacfal, twelleh-as-t-id iwergaz-is. Ccix ikker, ilsa irkacen-is, iddem abernus-is yerna iddem-d taεekkazt-is iεelleqen ar umesmar n ukufi yerna tattafsttart (akwerras) nni i si-iseḥsab d tedwatt n ssmax akked d umru n uγanim d kra n tewriqin isdukkel-iten-id meṛṛa akk d weqran, yerraten ar uqrab-is. Iεelleq-it ar tayett-is, llamba n trisiti deg-ufus, izwar zzat n Taher isemma af ciṭṭan i naεlit, indeh : Yalleh ! Msetbaεn. Tameṭṭut tessegra-d awal aneggar i wergaz-is tenna Lla Werdiya : Ahat ad tenseḍ ?

Ccix Aεli: Ih, aqlakem id ad qimmeγ ar umuḍin a lamma d azekka ssbeḥ ncalleh ! Lla Werdiya : -Ihi ruḥet ad isahel Ṛebbi fell-awen…! ad ddun yidwen iεessassen ! Taher ifreḥ ayen din imi d-idda yid-s Ccix Aεli. Leḥḥun ttmeslayen ma ttizir tuɣ tignaw, maca iɣumm-itt niqal usigna. Aqlaɣ akken kan εaddan sbaεyam-nni izegzawen n tefsut (si 15 ar 21 mayu). Lḥal iban d sḥḥu azekka, is-yenna Ccix i Taher, maεna illa-d kra n tasmuḍi deg iḍ agi, ma d ttignewt tezraε merra s yetran si lebḥar i ssaḥel armi ttaqanṭuct n Lbir, akka alamma d Ttamguḍṭ terreḍ ar zzat alarmi d udrar n Bunaεman. Isigna unagen amm-in isefsan taduḍṭ af igenni. Akka ma tebɣiḍ ulac aṭṭas n lweḥc. Ar ticki illa ṭṭlam, iɣelli-d lxuf nni ameqran ɣef umdan i teddun weḥdes deg iḍ. Ccix Aεli d Taher tteddun ttqessiren, zegren timeqbert n Sidi Aεmer u Fayed d iɣzer n Buqfa anda ittaṭṭaf bnadem lweḥc deg qerruy yerna s tidett. Nutni ceɣlen d umeslay armi i kecmen kan ar Uqelmim n At Kwella ṭṭerf n taddart ; dɣa gezmen-d s yenna kan qbala ar wexxam n umuḍin anda lla tent-ttraju Nna Tasaεdit. Axxam n Bujemεa n At u Mḥend yezga-d s ddaw n ubrid u taddart n At Iɣil, yezzi-yas-d ubrid ukerrus am umeqyas. Mi bedden af tewwurt n wexxam, slan si beṛṛa i umuḍin mi yettnazaε am akken it-yeǧǧa Taher mi iruḥ.

Hand Berkouk

1 COMMENT

  1. Tamaic n zik, attas ur ttnessin ara deg ilmezyen attas fell-asen. Ur nehsa yara amek ara tfak taswiit ghef awyen ig aaddan dfell-agh.

LEAVE A REPLY

Please enter your comment!
Please enter your name here