TAMURT – Ulac kra n lɛib ma ncudd tamsalt n weɣrum ar tutlayt n tmaziɣt (teqvaylit). Acuɣer ? I wakken tutlayt nneɣ ad tesɛu amkan-is am nettat am tutlayin nniḍen, ilaq as-nefk azal, azal tuklal, ad teṭṭef amkan-is deg wegni n tdamsa lak d unegmu. Amer nufa tili wid aka akk iqeddcen deg yedles n tamaziɣt neɣ taqvaylit ad afen iman-nnsen, « ad ččen aɣrum » am wid i qeddcen ɣef tutlayt tasɛudit d tiyaḍ.
Ma ulac ad taf iman-is deg rrif am tbujilt mebla imawlan, acku xilla n
Imaziɣen mazal ur tuɣ ara amkan ilaqen deg wulawen-nsen ɣas akken ayen
din seg yergazen i yettwajellden (torturer), yefkan tudert d wakud
nsen akken ad teffeɣ deg ṭṭlam.
Γef ayagi i ilaq-asen at tedrim, at nuṣurdi ad gren iman-nsen ar
wennar. Akken ma tella lfayda ad ifriren yeɣmisen s tmaziɣt. Imḍebbren
n tezrigin a d-fken afus i usufeɣ n yedlisen.
Acku aqlaɣ deg tswiɛt i yexxulfen tidak i yɛeddan, acḥal n widak ara
k-yinin : d acu ara txedmeḍ s tmaziɣt ma tessneḍ-tt ? Yiwen yenna-k
yiwen wass: « taqbaylit ad llemdeḍ ad tekkseḍ tikermusin ». Lmaɛna-s:
mačči d tulayt iseččayen aɣrum.
Akken ad d-tedher, ad d-yeflali wedles nneɣ, win yettarun ad yečč
aɣrum, win yessefruyen ad yečč aɣrum, win icennun, ad yečč aɣrum (01),
win yettarun amezgun ad yečč aɣrum am netta d wiyaḍ i yqeddcen deg
iḥricen nniḍen.
D wagi i d abrid deg ara neddu ma nebɣa ad tt-id-nessufeɣ deg uẓekka
deg is-thegga tegrawt n Ujda si 1962 .
Yal ccɣel iteddu s tedrimt. Akka i yella lḥal. Akken leqdic af tmaziɣt
ad yufrar s wazal-is. Ulac ayen d-ittasen s ulac. S waya leqdic n
menwala ur yettili u diɣen ula d widak ara k-yinin: « taqbaylit ur
seččay ara aɣrum ».
Hand Berkouk
