Yad yesseftayen tavɛuct „Corona“ (COVID-19)

0
Coronavirus
Coronavirus

FRANKFURT/M. (TAMURT) – Anwa i s-yennan ad yeḍru wannect-a deg useggas 2020? Yiwet n tevɛuct ur yizmir yiwen a tt-iwali s wallan-is  tekref timura; tneq yal ass aṭas n yimdanen deg umaḍal merra.

Ɣas akka, llan yad yeqqaren: „Ah „corona“ ur telli, ur tettili!“
Ma tidet teqqar-d ayen nniḍen: „Corona“ tenɣa aṭas n yimdanen seg wasmi i d-tlul taggar n useggas 2019 ar ass-a. Yal ass rennun ttmettaten aṭas n yimdanen. Amur ameqqran deg-sen d imɣaren akkd yad yuḍnen.

Yiwen wass mlaleɣ sin imɣaren imaziɣen-irifiyen di tlemmast n Frankfurt/Main/Lalman. Dɣa nniɣ-asen: „Azul ay imaziɣen“.
Nutni rran-iyi-d: „Azuuul, azul. “Dɣa yiwen deg-sen (Mimun) yewsa-d ɣur-i, ikker a-yi ger iɣallen. Nekk ddiɣ kra iquddimen ɣer deffir, nniɣ-as: „Amek akka
a mmi-s n tmurt, ur tesliḍ ara s tevɛuct „Corona“?
Netta yeclex seg taḍṣa, yenna: „Kečč d amaziɣ tettamneḍ s „Corona“ ?
Nekk rriɣ-as: „Ih! Amek? Yal ass tneqq aṭas n yimdanen, kečč teqqareḍ ulac-itt?“, Yernu kečč ur telliḍ ara d amusnaw di tluafa n „corona“, iwakken ad tiniḍ ulac-itt.“ Dɣa yeḍṣa, yerra takmamt, nkemmel amesay ɣef tlufa n tmeddurt.

Ihi llan aṭas n yimdanen deg waṭas n tmura am da di Lalman yeqqaren ulac „corona“, qqaren d adavu kan i iran ad yerr tikmamin i yimezdaɣ n tmurt iwakken a sen-yekkes „tilelli n wawal.“ Tikwal teffɣen-d „luluf“ n yimdanen ɣer iverdan, ur tlusun ara tikmamin, ttnaɣen akkd temsulta ɣef taluft n „corona“.

Llan daɣen kra, rran iman-nsen d imusnawen deg weḥric n tsertit qqaren: „Corona“ snulfan-tt-d imḍebren deg weḥric n tsertit iwakken ad snegren amur ameqqran deg yimezdaɣ n umaḍal. S wakka ad tifsus tmeddur i yad ar‘ ad yegrin.
Imusnawen deg wdeḥric n yivɛac yessaḍanen imdanen qqaren „corna“ tezmer ad tefti s leɣṣev seg temliliyin n yimdanen, am di tmeɣriwin neɣ mar’ad ttemduḥḥasen, ladɣa war tikmamin. Aṭas n yimdanen ur nettagad ara tura „corona“. Am akken imdanen-a nnumen yid-s; mačči am ussan-nni imezwura
n tlalit-is.

Yernu ɣas deg anida yessefk ad yerr yiwen takmamt (akken nnan imeḍbren n tsertit), aṭas n yimdanen sɛan azref ur tt-ttarran ara. Qqaren ulamek ar’ad yečč yiwen s tekmamt. Ihi annect-a nnan d tasureft (exception).
D acu kan tasureft-a yezmer a d-yini yiwen tuɣal d alugen (régle), acku llan aṭas i itetten, tessen, ttkeyyifen deg iverdan. Ladɣa da di Frankfurt/Main llan kra n yimdanen rran iman-nsen ḥercen, ttarran kra n tmiqwa n tebyart neɣ n waman deg ifenǧalen n lkaɣeḍ, teddun avrid avrid ass d akemmali war tikmamin. Yiwen ur yezmir a sen-yini mačči akka. Ula ɣer yixxamen anida medden ttarran timeɣriwin deg waṭas yid-sen, ur tzemmer ara ad tekcem ɣur-sen temsulta.
Attan tlelli i d-yettawin aṭṭan. Cwi kan mačči yal yiwen iteṭṭef coroa yettmettat. Amur ameqqran deg-sen itejji.

Nekk qqareɣ: „Deg wakud n waṭṭan „corona“, win yelluẓen, yeffud, neɣ iran ad ikeyyef mar’ad yili deg uvrid, yessefk ad ibedd di kra n tqernit, anida ulac medden, alama ifukk, ad ikemmel avrid-is. “D acu kan tikwal ineṭṭeḍ waṭṭan „corona “i yimdanen, war ma ẓran amek!
Ihi tamawt kan anida yella yiwen. Ula gar twaculin (deg yixxamen) tneṭṭeḍ „corona“, tikwal war ma yeẓra yiwen amek.

Ula da di Lalman amur ameqran ama d Almanen ama mačči, ur yettqaḍar ara tuǧǧit n wemḍiq n „lmitra akk d uzgen“ iyessefk a t yeǧǧ yiwen gar medden, ɣas rran tikmamin.
Agguren imezwura nɣil Lalman tezmer i „corona“ tiyf aṭas n tmura nniḍen. Seg taggara n useggas n 2020 yuget waṭṭan n „corona“ ula da di Lalman.
Nekk lliɣ deg imezwura yettarren takmamt seg wasmi sliɣ telha mgal „corona“.

Di tmura imi qqaren medden „timura n wezref akkd tugdut“ yezmer a d-yini yiwen, tilelli n wawal; tuččit, tissit, akiyyef n duxxam deg iverdan tezga senniɣ n wezref ad yeqqim yiwen s tezmert-is.

Attan twaɣit n yad yesseqdacen tilelli-nsen war tilisa!
Ssrameɣ aseggas-a ad yesserwel „corona tamcumt“, ad tuɣal tmeddurt am zik-nni!

Akli Azwaw
Frankfurt/Main, 10-01.2021