Tamurt Yukrayin tuɣal am teslit, irgazen ttnaɣen fell-as anwa ara tt-yawin

0
3800
Yukrayin, anwa ara tt-yawin ? (Foto espace manager)
Yukrayin, anwa ara tt-yawin ? (Foto espace manager)

YUKRAYIN (TAMURT) – Ass n 24 Furar 2022 Iɛessekriyen irussiyen ẓeḍmen ɣef tmur n Yukrayin. Tiwlafin i d-iskanayen arrac, tilawin, irgazen iregglen s imeṭṭawen si lbumbat, smektant-yi-d ɣef wakud n lgirra n 1954-1962 di tmurt-nneɣ, asmi nreggel si lbumbat i d-yetteɣlayen ɣef tudrin-nneɣ, nteffer deg iɣeẓrawen. Annect-a yerna-d ɣer lgirrat di tmura nniḍen i yellan yakan. Ihi tewwet tjenwit di tɛebbuṭ-iw, nniɣ : Acuɣer, acuɣer tawaɣit-a?

Almanen din din ldin tiwwura-nsen i Yukraniyin i d-irewlen si lgirra. Bedden ɣur-sen mačči d kra. Annect-a ufiɣ-t dayen yelhan, maca mmektiɣ-d daɣen amek tamurt n Lalman akk d tmura nniḍen n L’OTAN znuzun sslaḥ-nsen i tmura nniḍen (régimes dictatoriaux), neqqen s yess ula d arrac. S wakka ttaken afus daɣen i yad irekkḍen izerfan n wemdan.
Almanen, akken ttwalaɣ nekk, sseknen-d tura udmawen-nsen n tidet: Lemmer ufan tilaq ur d-ttasen ara ɣer tmurt-nsen imdanen ur nesɛi udmawen i sɛan nutni, d imellalen (icebḥanen) yernu d imasiḥiyen illan xersum deg yidles. (D acu kan mačči Almanen akk akka!).

Nekk ttwaliɣ mačči kan adabu alman akk d ikabaren i d-ibegsen ad fken ayen sɛan d sslaḥ akk, iṣurdiyen akk d wayen nniḍen i tmurt n Yukrayin, iwakken ad kemmeln lgirra mgal aselway n Russ, maca am akken amur ameqqran deg walmanen qqaren yessefk ad yexdem yiwen kra yellan iwakken ad yeḥbes yiwen aselway n Russ. Am akken yeffeɣ-iten wallaɣ.

Am akken ufan-d ssebba s lgirra n Russ mgal Yukrayin iwakken ad uɣalen ula d nutni d tamurt n lgirra. Am akken ttun d acu nnan asmi terfra lgirra n umaḍal tis snat. Imiren nnan, werǧin Lalman ad ger iman-is di kra n lgirra deg umaḍal. Tura Almanen uɣalen am akken ttheggin iman-nsen i lgirra iseggasen i d-iteddun. Nnan atan ad fken 100 imelyaren n € i tridsa-nsen (iɛessekriyen-nsen). Akabar n izegzawen (Les verts) yellan mgal L’OTAN, mgal lgirra, tura d netta iyečča wul nezzeh, nnan ad fken sslaḥ ameqqran i tmurt n Yukrayin. Ɣilen s wakka ar ad ḥebsen lgirra, ad ɣelben tamurt n Russ.

Timura n L’OTAN deg tama nnent ur ggarent ara iman-nsent di lgirra, deg tama nniḍen ttaken sslaḥ i tmurt n Yukrayin, qqaren iwakken imezdaɣ-is ad setnen ɣef iman-nsen.
Taggara uɣalen ttaken-as ula d sslaḥ ameqqran iwakken ad ẓeḍmen ɣef ucengu-nsen arussi. S wakka nnan tamurt Yukrayin tezmer ad teɣleb Russ. Aselway n Yukrayin Zelenski yessutur i tmura n L’OTAN mačči kan sslaḥ maca yessutur ad kecment ɣer lgirra mgal tamurt n Russ. Yessutur ad tekcem tmurt-is ɣer L’OTAN tura yakan. Am akken iɣil amaḍal merra yessefk a s-fken afus s sslaḥ akkd wayen nniḍen, ɣas ma tekker lgirra tamaḍalt ar‘ ad yenɣen ahat aṭas n yimdanen. Ihi s sslaḥ i ittaken i Yukrayin am win irennun isɣaren i tmes.

Aselway n Marikan (USA) Joe Biden yergem asalway n tmurt n Russ Wladimir Poutine, yenna-yas kečč d agezzar, yenna yessefk ad yettwikkes d aselway n tmurt n Russ. Am akken ur yeẓri ara aselway n Russ mačči d aselwa n Libya n zik-nni neɣ n tmura nniḍen. Am akken yettu tamurt n Russ ɣur-s sslaḥ amaɛur neɣ amek ? Am uselaway n Marika am iselwayen n tmura n L’OTAN nniḍen neǧǧɛen aselway n Russ iwakken ad yexdem tawaɣit tameqqrant ar‘ ad isnegren ahat amaḍal merra. Neɣ ẓran ur ixeddem ara annect-a? Tiwuɣa, lgirrat n tmura n L’OTAN mačči d yiwet yemmal-itt-d yiwen da.

Nekk akken walaɣ, ayen iizemren ahat ad yeḥbes lgirra di tmurt n Yukrayin :
Tamezwarut d timura n L’OTAN ma nnant i uselway n Russ : werǧin ad ǧǧent tamurt Yukrayin ad tekcem ɣer L’OTAN.
Tis snat Tamurt n Yukrayin ad temsefhem akkd d udabu n Russ anida ar’ ad ilint tlisa ger-asen.
Annect-a tugi-t L’OTAN. Aselway n unadabu n tmurt n Lalman Olaf Scholz i yenna i useway n tmurt n Russ Wladimir Poutine: Tamurt Yukrayin ur tkeččem azekka ɣer L’OTAN ur tkeččem seldazekka. Wladimir Poutine yenna-yas: I smana i d-iteddun?.

Aseggas n 2006 L’OTAN tenna ad teldi tiwwura-s i Yukrayin. Aseggas 2007 yerra-yasen-d uselway n Russ di München/Lalman, werǧin yezmer ad yeqbel annect-a. Tamurt n Yukrayin yellan ɣef tilist n tmurt n Russ teččur tura yakan d sslaḥ n tmura n L’OTAN . Annect-a yesserfay aselway n Russ, yernu yesɛa azref ad yerfu.

Aṭas n yad yeqqaren, aselway Poutine mačči d annect-a kan iyebɣa. Iswi-ines d tuṭṭfa n tmurt Yukrayin, ad tuɣal d akal n tmurt n Russ. Nekk annect-a ur ḥsiɣ ara ad yeḍru. Llan yad yeqqaren, tamurt n Russ ur tebɣi ara timura i s-d-yezzin ad uɣalent d timura anida ar ad tili tugdut. Aselway n tmurt n Russ yeqqar, timura n L’OTAN iswi-nsen d aseɣli n tmurt n Russ s ufus n tmura am Yukrayin. Ihi tamurt n Yukrayin tuɣal am teslit, ttanaɣen fell-as yirgazen anwa ar’ a tt-yawin.

Akli Azwaw

LEAVE A REPLY

Please enter your comment!
Please enter your name here