Aɛebbuḍ ma yeččur, allaɣ yettuɣal d ilem

3

Zik-nni asmi imezdaɣ n tudrin-nneɣ teddren kan s wayen i d-ttaken iḥerqan-nsen, yezmer a d yini yiwen ulac win i yifen wayeḍ s waṭas deg taluft n cci. Ula d ixxamen am akken d yiwen i ten yebnan merra ɣef yiwen n lqaleb.

Tiwizi tettili mara ad yekker yiwen ad yexdem ayen ur izemmer a t-yexdem iman-is. D taddart i d-yettawin ijga i useqqef n yexxamen. Imezdaɣ n tudrin wa yettak afus i wa deg wecraw uzemur, deg userwet neɣ deg wayen-nniḍen. Di tmettant d taddart i imeḍlen win yemmuten, d taddart i yettbeddayen ɣef inebgiwen i yettilin di temḍelt-is.

Argaz yettlusun abernus d azeddgan mara ad ifakken tawur-ines, idehhen cclaɣem-is s zzit uzemmur, yettarra iman-is am akken yerwa. D acu kan annect-a yezmer a t-yexdem yal yiwen.

Tura llan kra n watmaten-nneɣ teddun ɣef iɛebbuḍen-nsen i wakken ad bnun ssrayat ur sɛin yiwid. Ttaɣen ṭumubilat timeqqranin tiɣlayanin. Annect-a mačči d yal yiwen i s-izemren. Irgazen-a qqaren, yessefk ad ḥercen ad awin ula d nutni amur-nsen di tmurt. Qqaren, anwa yeẓran d acu ara ad yeḍrun azekka di tmurt anida ddren. Irgazen-a deg tizzli-nsen ɣef iɛebbuḍen-nsen tettun nnif-nsen, tettun iẓuran-nsen, Ur ttmeslayen ara d tarwa-nsen s tutlayt tayemmat-nsen. Anida ddan qqaren, mačči d tamaziɣt ara ad yesserwun tiɛebbuḍin-nsen, mačči d nettat ara ad yefken i tarwa-nsen imeḍqan yelhan mar’ ad imɣuren. Irgazen-a ttwalin Izwawen (Tizwawin) yettazzalen ɣef tutlayt-nsen tazwawt, ɣef izerfan-nsen ula deg weḥric n tsertit, am akken d iɛeggunen i llan.

Irgazen-a ur ẓrin ara tetten drus drus deg wallaɣen-nsen alma uɣalen d ilmawen. Imaren-nni ad zemren ad rren ula d allaɣen-nsen d iɛebbuḍen. Irgazen-a am akken ur ẓrin ara, ula d win yerwan yezmer ad yeṭṭef di nnif-is, adyedder s wudem-is akkd tutlayt-is! S wannect-a i yezmer ad yedder s tfenṭazit!