Aɛli Yeḥya Ɛebdnur : Ilemẓi n 90 iseggasen

0

Lemwaji n yillel agrakal yettmirjiḥen s leɛdez ɣef aman, ttmettatent ɣef leḥwaci n usagen n Lzayer tamannaɣt. Tizegzewt n yigenni tewcem inni-ines ɣef udem n lebḥer ur d‑neclig deg ayen iḍerrun deg uḍeḥḍaḥ n imeɣrasen. Ma d netta yellan d amɣar, yulli-d deg ul-is wesḥissef, am waddal ɣef tasa, di lawan deg lɣim yecrured deg allen-is tizegza akken ad yeḥku leḥzen-is ɣef wegdud yeddan di tzenqatin n meɣrud.

Abeḍḍaḥḍaḥ n yimeɣrasen yeččur d iserdasen s‑iɛekkzen deg uffus, dɣel deg allen , leḥmeq deg ulawen. Takemmict –nni n yemyesbayniyen i d‑yeǧǧan tabɣest akken ad lḥun, tezder ddaw ẓẓur i ten-id-yemmugren, armi uɣalen qrib ur d‑ttbanen ara amzun ur llin neɣ fsin deg ugni. Ma d netta amɣar n 90 iseggasen yerfed s tmuɣli nnig yemṣulta s wallen yeččuren d asirem. Tamuɣli-s temderkal ɣef waraw n wedgud yettwakren i wegdud akken ad regglen abrid zdat n wegdud, ihuz aqqeru-s yeffer deg ul-is leḥzen .

Deg igenni rruplan mazal tettmesḥilliq, teddewwir am yisɣi nnig iqerra n yemdanen. Zhir-is yuɣal d acqirrew i ṣṣwab, yuɣal d nneqma i lmeɛqul. Ifrax yennumen asriffeg nnig lemwaji n yillel agrakal, rewlen deg akken ttuceblen s yir ṭṭir (n wuzzal) isen-yeksen amkan. Allen n yimesbaniyen wehhan s lxeẓra ɣer iqudam n yemṣulṭa amer ad ssefrun s wacu ḥecren wulawen–nsen . Ma d netta isenden ɣef 90 issagesen di lɛemer-is, allen-is ffalent akkin i yiserdasen akken ad ḥekrent deg ilmeẓyen yeččan tijɛal akken ad ilin d asergal zdat n tikli n watmaten-nsen. Allen-is ssurgent imeṭṭi, acku neflent i tugna n wass-a dlent ɣef yir imal i ten-yeggunin nutni ur ẓran.

Imal ? Di ṣṣehd n tlallit –is yesrugmut s lmut, yessawal i lehmum, ifettel di ssiɛqat, yettnawal tiwuɣa ugarent tid yennulfan iḍelli d wass-a. Amɣar yezdin lqed n tnekra ɣef 90 isseggasen di laɛmer, yeẓra deg ul n wul-is mazal ur fuken ara leǧruḥ, mazal ad ilin wid ara yesserɣen deg yiman-nsen, wid ara yeddmen tiflukin n « lḥelyan » akken ad awin abrid n trewla, mazal ad mejdent lxalat…

Akka di Lẓẓayer tamannaɣt, anda ibedd ilemẓi n 90 iseggasen, yefka-d tamsirt n tirrugza. Yugi ad d‑yini ma d tasa neɣ d lǧehd i t‑isselḥuyen. Ma d wid yeẓran ḥṣan belli d tilelli i s‑yettagen afriwen. Akka i d Ɛli Yeḥya Ɛebdenur.