Aḍu n tlelli d tugdut – Amek ara tbeddel di Lzzayer?

5

Di tmurt n Tunes, deg wayyur n yannayer tella-d yiwet n tegrawla s wazal-is deg i d-yesken weɣref lebɣi-s s uɣluy n usnaraf Ben Ɛli mbaɛd 23 iseggasen leḥkem amsaltu.

Si tama-nniḍen aḍu i d-isuḍen ɣef Maṣer deg ayuren n yannayer akked fuṛaṛ, yegla-d s tuksa n ufarɛun mbaɛd 30 n iseggasen n leḥkem asnaraf.
Aḍu n tlelli d tugdut ikemmel deg webrid-is iḥuza timura-nniḍen, Libya, Lbeḥrin, Lyamen…

Di Libya, ɣas ma ahat sebba n waya d ddel id-yewwi « Lqeddafi », seg-mi yeṭṭef akersi yugi ad as-iserreḥ 42 n iseggasen?! Ccwalat-agi i d-iḍerrun di tmura n Libya neɣ di Lbehrin akked tmura i tent-icban d ayen ur yettamen yiwen.
Imi wid i tent-iḥekmen d abrak iberken ɣef udabu alarmi mmuten. U yerna s udebbuz iferrun timsal-nsen. Akka i d timura yeḥkem bu ɛmam, s ufella bannet-d cebḥent, zdaxel rkant.

I di tmurt-agi-nneɣ melmi ara d-isuḍ waḍu n tlelli d tugdut? Melmi ara d-ffɣen yemdanen ɣer iberdan, afus deg ufus ad d-innin: « neɛya deg ubeddel n wudmawen; nebɣa adyeɣli leḥkem ». Melmi ara d-yekker uɛsekri ad d-yerr asirem i wegdud s ibeddi-ines ɣer tama n wegdud yettwarzen afus aḍar?

Ayagi ad yeqqim d targit kan. Ayagi, ar melmi ara ad d-yesseɣres wegdud Aqbayli, ad yerẓ asalu, ad yekkes taɛkemt ɣef uqerruy-is yettwaxelsen s idammen n wid yeɣlin di tnekriwin yezrin mgal leḥkem n « iwaɣzniwen » yettsummun idim n wegdud war tawant.

Assen ahat tamurt ad ttbeddel udem. Ad ldint tewwura i tugdut d tlelli. Ad kksent tekmamin yellan ɣef yimi. Ad d-yuɣal wawal i wegdud?!