Aḥlil win izemren, aḥlil win ur nezemir!

3

Anwa akka yumnen belli Fransa tettɣalaf ɣef talwit deg Tmurt n Mali ? Anwa akka ara yamnen belli Lezzayer ur tessexdam ara irebraben i yellan deg Tmurt n Mali ?

Yal tamurt tekkat ɣef tebḥirt-is, ma yella d tibḥirin n wid ur nezmir, ɣas s ẓẓerb n uzeggar d inijel i as-yezzin, tibḥirt-is ad tt-ttwafeggel.

Ad as-feglen tibḥirt-is seg-sen ilefan ad asmen. Ad ak-feglen tibḥirt-ik yerna ad ak-sḍelmen, ɣer wiyaḍ d kečč i diri, d kečč i d amcum.

Yettuɣaḍ mmi-s n taɣaṭ mi i t-yečča wuccen.

Ttmeslayen ɣef tlelli, d nutni id bab n tugdut. Ayla-nsen bnan-t iḍelli, i wiyaḍ ttruẓun tawwurt. Arebrab d arebrab ɣas ur yesɛi ara aččamar, arebrab n Libya am win n Surya, ttemcabin akk ɣer wid n Mali akked wid n Lezzayer.

Ur yelli urebrab yelhan, ur telli tugdut n dir. Ur yelli buččamar ḥninen, ur telli tlelli berriken.

Tirwiḥen ɣer-wen ur ksibent yiwen wazal, ɣas teqqarem izerfan sɛedlen imdanen. Amdan d amdan; d bu sin iḍarren, ma d wid-nwen tsemɣim-asen-d afriwen.
Akal n win ur nesɛi iɣil, terram-t d ayla-nwen. Akal-nwen ibnan imawlan-nsen s
yiɣil, yettuḥerem i tarwa-nsen.

I aɣ-tefreḍ deg urebbi-inek a zzman n tlufa, tugdut d ddel akken-nni i ddukulen, tilelli d lbaṭel akken-nni i ttemizwaǧen.

Aḥlil a win ur nezmir, aḥlin a win izemren! Yettuɣaḍ win i ken-yettamnen, yettuɣaḍ win iḥeṣlen ger-awen.

Irnaten Murad