Ad ten eṛṛzen ma γeflen

0
396
ad ten erzzen
ad ten erzzen

Ayen akka iḍran deg Imẓaviyen ussan agi izrin ismektayaγ-d d yir ussan. Erra-d s iqerray nneγ ass mi ttḥevsen kra n Iqvayliyen. Tiyita ccan Masin Uharun d tarvaât ines n 1976 ass mi sḍerḍqen lbumbat di Llezzayer d Wehran. Neγ Ferhat d Ssaâid Saâdi ass mi ttnaγen γef izerfan n umdan deg iseggassen n 80 ivarkanen.

Xarttum macci d tikkelt macci d snat i iḥves udavu azzayri ameḥrus wid id-ikren mgal tikli-s. Macci d yiwen macci d sin n Iqvayliyen i iṭṭwatfen gar tucar nsen.

Assa γlin γef Imẓaviyen. Ttuγaḍen msakit. Ulac tin ur uqimen deg sen. Ssawḍen ssarγen kra deg sen d imudduren. Ssarkin asen Iceâembiyen, am iqjan i mgagin fell asen ggarcen deg sen akken isen ihwa. Lḥasun uqmen deg sen tin ur sinnen. Urjjin iγ tent uqmen txidas isen uqmen i nutni. Rnan ten timarna n tfunast. Tamheqranit deg zal qayli. Teḍra asen am wid ittwaḥeqren yerna ur sâin la tagmatt la imḥiddan.

Wid isen d-ifγen i ivardan nnan asen hemma, ḥevsen ten. Deggren ten ar gar iγerrav akken a ten ssekten. Akken ur ssufuγen ara awal ar verra. Akka ara âarḍen a ten eṛṛzen. Acku ma illa ssawḍen eṛṛzan iqerray  nsen am dk. Fexxar inni eṛṛzan ten d ayen. Dγa ad kecmen s « avrid » msakit Imẓaviyen.

Ma illa rran ad nnaγen s tidet Imẓaviyen γef izarfan nsen issufek fell asen ad ḥsun d akken amecwar γezzif. Mazal ad idiren ussan ivarkanen ar zdat. Akken ad awḍen ar tafat, ilaq ad zegren aṭellis ara d-γlin fell asen. Ur asen ilaq ara ad feclen, ad knun. Mawel kra grarven ad iruḥ γef ilem. Dγa ad ten eṛṛzen, syin ad rekden kra isseggassen diγen. Ad kecmen di tnafa ara asen iḍegren xila n wakud.

Ad nudmen alama yufrar-d diγen Fexxar nniḍen gar asen. Maca ma ḥarcen ẓewren assa ur sbabayen ara taâkemt kan γef Kamal Fexxar d kra n imeddukal is akken xas sseγlin-t netta amennuγ nsen ur iγelli ara. Ilaq asen ad ilin ar tama-s assa d uzekka as ṭfen afus imi di leslaḥ n uγref nsen iteddun afus deg fus.

Ihi ayen iḍran deg Iqvayliyen ilaq ad istenfaâ i Imaẓiviyen akken ur ssexsaren ara anda nessexssar nekni. Akken ur ttâawaden ara s wadda i umecwar. Ma ilaq lemden deg umennuγ nneγ assa, ad sâun taqeddimt ar zdat d ussirem d akken ad ssiwḍen ar iswi d levγi nsen.