Adlis amaynut n Ferḥat At Sɛid

1

{{{ “Acu n wezref i d-yegran ma mačči d tiḥeqranit, acu n
leɛqel i d-yegman ma mačči d bu ddreɛ, acu n nnif i ten‑iselḥan
ma mačči d afus n lbaṭel, i waken iɣerfan neɣ
imḍebren-nsen ad snegren iɣerfan nniḍen, s yidelsan d
tnekiyyin nsen, s tutlayin d wansayen nsen. Yerna ahat ad
ten-arǧǧun i waken ad sen-qeblen, ad sbedden ddulat nsen?” }}}

Aselway n Unabaḍ Uẹɛḍil Aqbayli, Mass Ferḥat At Sɛid yessufeɣ-ed adlis
amaynut. Di 2004 yura-d : ”{{Lezzayer: taluft n tmurt n yiqbayliyen [[Algérie : la Question Kabyle.]]}}”, ass nni n
18 deg nubember 2010, yessufeɣ-ed : “{{Awines n tnekkit: taggara n ddulat i d‑teǧǧa temḥersa [[Le Siècle Identitaire, la fin des états post-coloniaux.]]}}”. Idlisen-agi deg sin fɣen-d ɣer tezrigin MICHALON.

Wis sin-agi, yekka akkin i tmurt n yiqbayliyen i wakken ad tt-id-yerfed deg tizi
n taluft tagraɣlant : iɣerfan i mazal ur zdin ara ddulat-nsen. Awal i d-yewwi
uselway n Unabaḍ Uɛḍil Aqbayli, yesenqed s telqey tikta d tesnekta si ttberiḥent,
nnig n 50 iseggasen tura, ddulat i yeselḥuyen tasertit tagraɣlant.

Deg tezwert i s-yura uneɣmas amarikani, Roger Kaplan, yesfehem-ed acimi i d‑yenjer
Mass Aselway Ferḥat At Sɛid, abrid i yiɣerfan-agi ɣer usuter n tlelli-nsen
s webrid n timannit d leqder i tamagit n yal yiwen. Yura-d belli: “{Ferḥat Mhenni
ur yelli mgal aɛraben neɣ izzayriyen, am waken i tettarun kra n yeɣmisen.
Baba-s d amjahed i yemmut akken ad yessufeɣ Fransa; netta yekker-ed yewwi-d
yid-s tissas d usirem n wid yeɣlin akken ad tbed tmurt s tegmatt d lxir. Ur yeffir
fell-as kra i teḥnunef tmurt n yiqbayliyen i tmunnent n tmurt n Lezzayer. Yeẓra
belli aqbayli mačči d win yugin aɛraben, mačči d win yugin izzayriyen. Deg
wayen yexdem, i yemmeɣnes ama deg “Syndicat” n iselmaden n UGTA, deg
Umussu Adelsan Amaziɣ (MCB), ama di cna-s d tmedyazt-is, atg. Ad d-naf,
belli abrid n Ferḥat At Sɛid, d amennuɣ n win yumnen s tlelli, i tt-yebɣan i
wiyaḍ}” sbt. 20.

Tira n wedlis-agi tebḍa ɣef 14 n yixefawen. Yal yiwen acu n temsalt i d‑yesqerdec.
Deg-sen meṛṛa, d tuzya ɣer tallit n umezruy n temḥersa i d‑yesbedden
ddulat timcumin. Ama deg tefriqt, deg marikan n wadda, neɣ deg
tmura n usammer. Yesfehem-ed s telqey acimi tugdut ur tezmir ara ad taɣ aẓar deg ddulat-agi, imi ṛeṣṣan si tazwara, ɣef tkerkas, lexdeɛ, timḥeqranit,
timenɣiwin d uɣurru.

Ass-a, kra yellan d asirem i wesbeddi n tugdut d tatrarit di tmura-agi yefsi am
wedfel. Imi seg mi tefra lgerra tagraɣlant tis snat, wid yeṭfen tasertit n ddunit,
mačči d izerfan n wemdan, mačči d tilelli n iɣerfan, neɣ d aseḥbiber ɣef yal
tinekkit ara d-yernun tadla-s s annar n talsa, i ten-yecqan !! Maca i ten-yezzan, d amyezwer ɣer tuṭfa n tqacuct, ɣas ad glun s iqerra n iɣerfan d yidelsan i yebnan timura-agi i ḥekmen.

S wedlis-agi, Ferḥat At Sɛid yessaɣ-ed abrid, yekkat ad yesakwi meṛṛa iɣerfan‑agi
i waken ad myefken tayett, ad sbedden ddulat-nsen timaynutin. Akka kan
ara yizmiren ad ḥerzen tadfert-nsen, yerna ad as-aɣen afus n talwit d liser i tudert
tagraɣlant n uzekka.

({ad ikemmel…})

1 COMMENT

  1. azul, Ferḥat seg zik i yella yettḥuddu γef yedles nneγ, s ccna-s »aqcic d uεeṭṭar » s tsertit-is: yella deg yal amussu yekkaten γef uγref nneγ, widak i s-yegzan ddan-d deg ubrid-a ines, s udlis-a amaynut, nessaram a d-rnun ugar ar ubrid-agi ara γ-id-yessufγen di tcerkkeṭ n yemhersen.

LEAVE A REPLY

Please enter your comment!
Please enter your name here