Aman n Zemzem zemren ad ssiḍnen amdan s lkunsir

2

Ccekk yebda-d seg waman n Zemzem i yettnuzun deg tḥuna n yenselmen deg Lundun, di tmurt n Legliz. Imi sen-xedmen tasleḍt (analyse), ufan belli ɣer-sen nnig n wayen yessefken deg uḥertit n Arsenik. Nnan ahat d imzenziyen n Lundun i iɣeddren imsaɣen, dɣa rnan gan tasleḍt i waman n zemzem yettnuzun deg Fransa. Agemmuḍ yeffeɣ-d am win i yufan deg Legliz.

Dɣa, i wakken ad kksen yakk ccekk, ssutren deg yiwen n lḥaǧ ad sen-d-yagem aman seg Mekka. Imi t-sεeddan ɣer laburaṭwar, ufan ulac i ibeddlen. D ayen i d-yesbanen belli aman n zemzem ur yessefk ad ten-isew umdan, ma ulac ad iḍur tazmert-is.

Aman yettilin deg ugama ɣer-s 10 μg·l-1 n uḥertit n Arsenik. Maca, OMS teqqar-d yessefk ad yili seddaw n 0,01 mg·l-1 i wakken aman ad lhun i tissit. Kanada tqebbel alma d 0,025 mg·l-1. Bangladec d Lhend ḥebsen-t ar 0,05 mg·l-1.
Ma d aman n zemzem, ufan deg-s nnig n 20 mg·l-1. wali da: http://al-kanz.org/wp-content/uploads/2010/10/analyse-zamzam.jpg

Arsenik d yiwen uḥertit i yessebluyen (yesserhajen) amdan. Win yeskecmen drus ɣer tfekka-s seg uḥertit-a yezmer ad t-ṭṭfen iriran, ad t-yeqreḥ ugerjum-is d uεebbuḍ, ad yebreḍ ula d idammen. Ma yella d win yezgan fell-as yezmer ad s-d-yexdem lkunsir n yidmaren, n weglim, n tembult akked win n tegẓelt. Akken daɣen i yezmer ad s-yessehbuber iẓuran n idammen.

Lbir n Zemzem yezga-d deg Lkeεba n temdint n Mekka. Tissit n waman-is d ayen yessefken ad t-yexdem lḥaǧ uqbel ad yerzu ɣer Minen. Akken d-ḥekkun, d Rebbi i yumren aneglus Ǧebril i wakken ad d-yessufeɣ aman-a i Haǧer d mmi-s Smaεil i yeṭṭef fad deg tlemmast n uqeqaḥ n Mekka. Ḥekkun-d daɣen belli s waman n zemzem i yeslal Ǧebril ul n Muḥemmed deg yiḍ-nni ideg yuli ɣer igenni, ayen iwum semman Lmiεraǧ.

Qqaren-d belli aman n zemzem ɣer-s aṭas n lfayda i tezmert n umdan. Muḥemmed yenna-d : « {D aman n zemzem i yufraren akk ɣef waman yellan deg lqaεa, yelha i tissit yerna d ddwa n ḥellu} ». (Ṣaḥiḥ Lǧami, 3302). Nnbi n yinselmen yenna-d daɣen : « {Aman n zemzem lhan i kra yellan iɣef ten-tenwiḍ}” (Yewwi-t-id Ibn Maǧa, 3062)