Aman ttarran ssmayem d tafsut

1

Tikkelt yezrin, yiwen wemɣar yenna-yi-d belli taḥriqt-is tamecṭuḥt uzemmur, yesεan 100 tzemrin, tettekkes-as-d azal 300 n litrat n zzit i useggas. Imi nudaɣ deg internet, ufiɣ belli tazemmurt tezmer ad tessiweḍ almi d 10 ar 15 litrat, maca yessefk ad tsew. Ihi, awah (lemmer) akerraz-a yettak i tzemrin-is aman, ur yettkalay ara kan ɣef lgerra (lehwa, ageffur), ad yessimɣer lɣella-ines 3 tikwal ɣef wakken yennum yettawi-d deg yal aseggas. Lmeεna-s ad d-yejmeε 1000 litra, ayen swacu ara d-yawi 40 imelyan sentim (3,5 imelyan / aggur).

Imi s-nniɣ akka, yeḍsa-d ngum ad iyi-d-yini: “Ayen i d-tḥesbeḍ akka yelha, maca kunwi yeɣran akka tḥercem kan deg lkaɣeḍ. Ttxil-k ini-yi-d swansi ara d-awiɣ aman i teḥriqt-iw? Ayak teẓriḍ, tebεed. Yerna waqila ɣas ad s-teɣzeḍ anu (lbir) ur d-tessalayeḍ ara aman deg seḥra-nni.”

{{Tifrat i weɣbel n waman: }}

Uɣaleɣ tikkelt nniḍen ɣer internet, ufiɣ aziɣen tella tifrat: Yessefk ad neḥrez kan aman n lgerra. Atan wamek:

Ad d-nexdem sseqf iwumi ara neg targa. Akka mi ara d-tewwet lehwa, aman-nni ad ten-id-neḥweṣ ɣer ugelmim.

{{Deg useggas, acḥal n waman i nezmer ad d-nejmeε?}}

I wakken ad nektil aya, yessefk ad neḍfer leḥsab-a:

Tasmekta n waman ara d-nejmeε = (acḥal i d-yekkaten d lgerra deg temnaṭ ideg yella ssqef ) x (tajumma n ssqef)

Amedya:

– Di tmurt n Yeqbayliyen, ageffur yetteɣlay-d s waṭas, s tlemmast n 800 mm.
– Ad d-nin ssqef-nneɣ ɣur-s 100 m².

Ihi, tasmekta n waman ara d-nejmeε deg useggas = 800 x 100 = 80 000 litra = 80 m3

1 COMMENT

LEAVE A REPLY

Please enter your comment!
Please enter your name here