Amdan d wayen yeḥwaǧ deg tudert-is

3

Tazamugt n yiḥewwiǧen d yiwet n tiẓri ɣef tmeglit, i d-yessufeɣ umejjay n tnefsit Abraham Maslow, deg 1940. Seg wass-nni, imejjayen n tnefsit xeddmen, meḥsub, ala yes-s, aladɣa deg ayen yerzan iɣeblan n uxeddim.

Tazamugt-a tebna ɣef semmus (05) n yiswiren igejdanen. Γef wakken yettwali Malsow, amdan yettnadi ad yessekfu iman-is deg uswir n yiksar qbel, sumek ad yebdu ad yettxemmim ɣef uswir i yellan suffella. Ur yezmir ara ad yali ɣer uswir unnig ma yella win yellan iksar ur s-yessaweḍ ara. Amedya, nettnadi ad nessekfu iḥewwiǧen n tfekka-nneɣ uqbel wid n teɣlist : ɣef wannect-a asmi ara yili umdan sdat n temettant, yezmer ad yexdem kra yellan i wakken ad s-yeslek.

{{Iḥewwiǧen n tfekka :}}

Iḥewwiǧen-a d wid yettaǧǧan tafekka n umdan ur tettemttat ara. Meḥsub, d ayen yerzan ɣer tezmert n umdan : asnuffes, učči, tissit, iḍes, asezɣel..atg. Amdan yezmer ad isemmeḥ deg tefrit, ur yettaǧǧa ara deg yiḥewwiǧen-a n tfekka.

{{Iḥewwiǧen n teɣlist :}}

Iḥewwiǧen n teɣlist d wid yettεassan ɣef tezmert n tfekka akked wallaɣ n wemdan. Nezmer ad d-nader deg-sen tamezduɣt, axeddim d tedrimt, taɣlist n tfekka mgal lbaṭṭel (tukksa n sser, attεeddi, tamḥeqranit..), taɣlist n wallaɣ d tnefsit, talwit deg twacult neɣ xerṣum d cwiṭ-nni n leḥnana d tezmert.

Sin iḥewwiǧen-a imenza (tafekka akked teɣlist) ttekkan deg yizerfan n umdan. Maca mačči Iwunak yakk ssawḍen ad qaddren izerfan-a, ɣas akken uran-ten deg Tmendawin-nsen.

{{Iḥewwiǧen n uḥelli n umkan deg tmetti :}}

Aya yerza anadi n wemdan ad d-yini ayen i t-iceɣben, ad yesεu assaɣen, ad yezdi ɣer kra n terbaεt n yemdanen. Iḥewwiǧ-a n unekcum ɣer kra n terbaεt yeddukul akked iḥewwiǧ n tukci n wazal d lemqadra deg tmetti.
Tuget n yimdanen ur zmiren ara ad idiren i yiman-nsen. Wid yettidiren i yiman-nsen, sumata, ttettaṭṭaf-iten timexlelt neɣ tidderwect.

{{Iḥewwiǧen n lemqadra n yiman :}}

Amdan yeḥwaǧ ad yettwiqader, ad iqader iman-is. Yeḥwaǧ ad yeqdec i wakken ẓren wiyaḍ yella. Yeḥwaǧ ad yesεu amkan yelhan, yesεan ccan neɣ εlayen, deg uxeddim-is neɣ deg tɣawsiwin i iḥemmel. Amdan yettnadi ad yesεu azal (ɣer yiman-is neɣ ɣer wiyaḍ) deg wayen i ixeddem. Amdan yeḥwaǧ ad yesεu isenfaren, iswiyen, tikta, tidmiwin, tazmert ad d-yini ixemmimen-is…

{{Iḥewwiǧen n usekcem n yiman :}}

Amdan yeḥwaǧ ad yesseεyu iman-is ɣef kra n temsal, ad yissin kra n tussniwin timaynutin, ad yelmed kra n tɣawsiwin ur nesεi ccan, i yeǧǧan wiyaḍ.

{{Iḥewwiǧen n walluy deg uswir :}}

Amdan yeḥwaǧ ad yemmeslay s tussna, ad inadi deg yiman-is, ad yissin iman-is.