Amedyaz Nufel Buzbuǧa di tegzirt Fanø

0
213

As n 27 di Yebrir 2013, anaẓur aqbayli Nufel Buzebuǧa ineced-d inaẓuren Ɛmar Ɛmarni, s uẓawan-is amelḥan d ttaɣect-is tamsesrart, akked tnaẓuṛt tabulgart Ana Salaẓar s ceḍḥ-is atrar ɣer tegzirt tadanwatt n Fanø i yiwet n trebbawt nekwa-s: Brut-as i Wawal-iw! Amahil n trebbawt-a yettuhegga-d ussan-a yezrin s yeḍrisen n Nufel akked usufeɣ-is ɣer isulas akked uẓawan n Ɛmar d cḍeḥ n Ana.

Tamawt belli tarebbawt-a ad tili d tamenzut acku inaẓuren-a ad d-zzin i waṭas n tmura n Urupa. Taɣiwant n Fanø s ugensas-is Henning Kjærgaard akked usqamu n tẓuri adanwat s ugensas-is daɣen Søren Beltoft mudden allalen i ilaqen i yinaẓuren-agi i wakken ad rezfen ɣer yigliyen-nniḍen daɣen i wakken ad d-begnen taẓuri-nsen di tmura tirupyanin.

Ana, Nufel d Ɛmar qqimen di tegzirt-a azal n 8 wussan. 8 n wussan d amahil deg Wexxam n Uẓawan di taddart icebḥen n Sønderho, d taddart yelhan akk di Danmaṛk. Amahil n inaẓuren-a yella-d s usemlili n yeḍrisen n Nufel ɣer cna d uẓawan n Ɛmar akked cḍeḥ n Ana.

Ana txeddem cḍeḥ azi, d cḍeḥ atrar, tesɣaray cḍeḥ di Sofia di Bulgariya.
Ɛmar d yiwen unaẓur yettnalen aṭas n tewsiyin: uẓawan, taklut, cna, yettidir di Sbanya.

Nufel d amaru yettidiren di Danmark, iḥemel ad yessili iḍrisen-is ɣer isuyas.