Amek ar ad d‑tili talwit ma tkemmel akka?

9

Wama lezzayer tura, win ara yeslen
ttmeslayen fell-as, ad yini tif akk timura. Maḥyaf d ccwal tettidir
tmurt n yeqbayliyen d win i d-yeslal udabu s tsertit-is ibeṭṭun ger
iqbayliyen, kra ḥemmlen tamurt-nsen, wiyaḍ d Fransa i ten-id-irebban, d
ayen i d-yeglan s temḥuqranit d uɣunzu ger warraw n tmurt n
yeqbayliyen.

Rrebrab d taluft iceɣben aṭas at ufella, ɣef aya uɣalen d imnayen n
talwit, ferrun tilufa n wiyaḍ imi tizi-nsen tessaweḍ-iten ɣer waya, s
yisem n talsa, ttnadin ad reṣṣin talwit ger tmura. Ad yettwabdar
yisem-nsen ger wid yelḥan ɣer zdat.
Iswi-nsen ad yili deffir n talwit n wiyaḍ, ma d Iqbayliyen;  » awer
d-yeggri yiwen deg-sen ».

Γer at ufella d t-a i tifrat s waya ad d-ggen tilist i ccedda i deg
tettidir tmurt n lezzayer, maca tilawt teqqar-d ayen nniḍen.
Iqbayliyen mazal ur fhimen ara d acu i d anamek n talwit ɣer at ufella
imi d nutni i yessenttagen isufa.

Amek ara d-tili talwit ma yella mazal ttnaɣen iqbayliyen? Amek ara
d-tili talwit ma yella mazal rrebrab di tmurt n yeqbayliyen? Amek ara
d-tili talwit ma yella rran taqbaylit d ayen ur nesɛi azal? Amek ara
d-tili talwit ma yella aɣref aqbayli ur as-yuɣal ara leqder?…

Ass-a, ma nger tamawt ɣer liḥala n tmurt n yeqbayliyen, ad d-naf am
yiḍelli kan, ulac d acu i ibeddlen. Tiwuɣa mazal ḍerrunt-d yal ass, di
tudrin, di temdinin, deg iberdan, di teflisin… Iqbayliyen mazal
leḥḥun deg webrid n tugdi. Ihi, anda-tt talwit-nni ttrajun Iqbayliyen?