Amennuγ nsen nutni

0
663
amenuɣ f tidets
amenuɣ f tidets

Amennuγ umaziγ si 1949 ar 2001 irfed it Uqvayli. Γef yisem n Imaziγen d tirni i immeslay, i issuγ xas akken nutni ur asen nesli ara aṭas aṭas. Ula d tafsut is n 80 issawal-as Tafsut Imaziγen.

Aqvayli iḥsa d akken amezruy d iẓuran sduklen-t netta d Imaziγen nniḍen u ihsev iten d atmaten. Urjjin issuter kra i yiman is ijja ten nutni. Izga issidir di tirga t ijjan, t ifuten ass mi illan ak Imaziγen ttmeslayen yiwet n tmeslayt. Tallit n ugellid Masensen neγ n mmi-s Yugurten. Ulac tin ur yuqim ara akken ad d-yerr ussan nni n yiseγ. Iruḥ am akken ittu ayen nniḍen. D aya kan id-illan gar wallen-is.

Si tafsut taverkant d wayen iḍran d Iqvayliyen, isuḍ-ed waḍu n tnekra. Tlul-ed tmuγli nniḍen. Am akken yuki uqvayli d yiman-is. Ivda ihi Uqvayli ameslay γef yiman is. Ildi allen is iwala tilawt. Issali-d imussuten n timanit d unavaḍ uâḍil.

Assa nedda amecwar. Nuẓa aṭas ar zdat almi nessutur azarug i tmurt nneγ.

Maca tanekra yagi neγ aveddel n tmuγli n Uqvayli tḥuza Imaziγen nniḍen. Am tiγri deg ifri, tettara aγlaγal. Ḥusen i yiman nsen Imaziγen nniḍen am akken iman nsen id-qqimen. Imi Aqvayli ilha d yiman is, ulac win ittmeslayen fell asen. Dacu ara uqmen tura ihi? Ad ssusmen, ulamek! Ad qqimen ulamek!

Imi deg iqerray nsen teẓẓa yagi taâeqqayt umennuγ imi zgan ttmuqulen deg Uqvayli mi ittnaγ, refden ula d nutni avrid umennuγ γef yiman nsen. Innulfa-d umussu n timsmit ar Icawiyen d win Icelḥiyen d win Irrifiyen. Ekkren Imẓaviyen diγen ad erren tiyita i Icâembiyen iten ikkaten aṭas ayagi. D Itargiyen kan ur nerjji yiwen. Aṭas aya d nutni d aveckid γef tmurt nsen.

Aqvayli ihi xas ilha d yiman is assa, issaweḍ ijved ar zdat Imaziγen s umata. Iḥars iten ad izmiren i yiman nsen. Idegger iten ar timanit xarttum deg umennuγ γef izarfan d iγerfan nsen.

Ziγen tezmreḍ ad teṭfeḍ afus i umdan xas tezziḍ as s uârur.