Ameyyez send aneggez

1

Imezwura-nneɣ ǧǧan-aɣ-d awalen yessefrayen tilufa n tmeddurt anida yedda yiwen. Dɣa nnan: „Win yeɣzan tasraft i gma-s ad yekcem netta deg-s.“ „Win yessusfen ɣer igenni, tisusaf-nni a d ɣlint ɣef wudem-is“. Ma d nekni s Yizwawen nugi a neldi allen-nneɣ, i wakken a nferru amcaqlal-nneɣ (imenɣi-nneɣ) war ma teḍra twaɣit.

Aɣbel-nneɣ ameqqran: Neččur d nnif n twaɣit, neččur d nnefxa, neččur d tismin. Ur nessismiḍen ara idammen-nneɣ mara a ten-yesserkem yiwen s kra n rregmat. Tawaɣit-a-nneɣ ssnen-tt (faqen-as) icenguyen-nneɣ! Dɣa ufan-aɣ abrid, kkaten-aɣ wa s wa, nutni rewwun teḍṣa deg-neɣ.

Tura yewweḍ-d wakud i wakken ula d nekni a nelmed amek iferruy yemdanen n tmura-nniḍen amcaqlal-nsen, war ma wa yessenger wa. Acuɣer mara ad nnaɣen sin watmaten, yiwen ur yeqqar d yiman-is: „Wissen ahat d nekk i yeffɣen i webrid“

Win yettnaɣen s idammen rekkmen, yezmer ad yexdem tawaɣit ɣef ara ad yendem taggara. Ihi abrid n tifrat d asismeḍ n idammen, d alawem s wawal aẓiḍan!

Awal-a: «Suref-iyi a gma» yezmer ad yesnecraḥ ul n win i t-yeqqaren, ad yedder s talwit alama qemcent wallen-is! Naɣ qqaren imezwura-nneɣ: „Ameyyez send (qebl) aneggez!

Sɣur Akli Azwaw