Ansay n umager n umenzu n yennayer di temnaḍt n At Yillilten

3

Ad fɣen iquranen ad kecmen izegzawen, tamurt ad ger imeɣan imezwura: aǧeǧǧig amellal ad imager iṭṭij, ad berjen isekla, ad bdun tbeddilen talaba.

Ad ɛerken medden aḥeddur ad sewwen timellalin, ad zlun iyuẓaḍ, ad fetlen seksu ad t-seqqin s sebɛa n isufar, ad bedlen inyen i lkanun, ad ksen kra yellan d aqdim, ad t-bedlen s umaynut. D tudert tamaynut ara ilalen s ugma ara ibedlen talaba.

Akka i sfilliten medden s umager n umenzu n yennayer ad tt-naqel tudert-nsen ɣer wayen yelhan Ssaramen i yal yiwen aseggas inuren, yeǧǧuǧgen, ara yefsin tiyersiwin ɣef twenziwin.

Zik deg wansayen n tmurt n yiqbayliyen, tilawin deg wass n umenzu n yennayer ad kren mara yettnaɣ wass d yiḍ, ad tezwir teslit n wexxam ad tessiɣ taftilt ad zzi yi-s i tɣemmar-is , yal tasga ad tt-tcebbeḥ s tafat n tcemmaɛt neɣ n ubellar, s yin akkin ad dduklent nettat temɣart-is ad slilwent i yikufan n temẓin d wid n tazert, i wecbayli n zzit d win n wudi, i texsayt n uyefki, i wayen akk i deg ttaǧǧan medden tagella, sakin ad bdunt ad tɣennint:

A lferḥ-iw a rrezg-iw

Ass-a ilul-d yitri

Ifreḥ win iṭfen igenni

Rniɣ ula d nekkini

Nefreḥ s nneɛma tugar

Akufi yeččur, acbayli yufrar

Ad nečč ass-a ad yagar

Ad yefk kra i furar

Ḍani ad ččaren ikufan

S ugellid-nneɣ ameqran

Mi kfant deg wexxam ad rzunt ɣer lexlawi, ad ɛennint, ad sfiltent i lfal yelhan ad slilwen i tzemrin, i tneqlin d wayen akk i d yeggaren ayen ẓiden, ad d-glunt s-yinna s yiẓra imaynuten i lkanun, ad s-agment iɣed, ad s-beddlent iẓra i yinyen, ad sizedgent axxam uqbel ad yali waggur n yiṭṭij ad izeggen igenni. Mi kfant ad tekker temɣart ad d-fren 7 n isufar iquranen, wid yettɛawaden talalit: am ibawen iqquren, abiṣar, ajilban,…i d-yesmektayen agama yetbeddilen udem, ad gent yi-s aseqqi n seksu, iwakken ad tefti tgella n useggas-nni xir n tin n useggas yezrin wa d tbeddel tegnitt ama ɣef imeɣban ama ɣef wid yesɛan.

Irgazen si tama-nsen ad kren ad zlun ayaẓiḍ ɣef wemnar n tewwurt, ad ṣeṭlen iwarrac nnig tewwura n uqerru, arrac i d-yufa uqerru n useggas i tikkelt tamezwarut, ad sen-ssimsen idammen n uyaẓiḍ-nni yemmezlen, qqaren « akken ad ṣeḥḥin iqerra-nsen ur ttaḍnen ara. Tullas timecṭaḥ ad bedlent lbus, ad lsent tiksiwin timaynutin, ad zzint i taddart, axxam axxam, ad jemɛent aḥeddur, neɣ iwzan d tmellalin yewwan deg waman, d winna i d lferḥ-nsent. S wakka ad mlilen medden ad zwiren awal ẓiḍen i yal win ara d-mmagren. ad as-ssirem, aseggas-nni ad infel lxir, ad nneflen ikufan d yicbuyla, ad yagar wučči, ad yečč kra n wayen iteddun ɣef lqaɛa  » Tayemmatt ».

Tamawt: Ansayen-a xedmenten zik i umager n umenzu n Yennayer, ma di tizi n wass-a ugtent tfaskiwin i deg i t-id-nettmagar, amedya di taɛacurt. Ssufuɣen medden seksu ɣef warrac i d-tufa ( tɛacurt) i tikkelt tamezwarut, tseṭṭilen-as, zellun iyuẓaḍ, teggen timecreḍin.

Di lɛerc At Yilliten tura, yal taddart d acu is-d-yeqqimen deg wannect-a: ta d asefru kan i d-yegran, ta d tuzya n warrac ɣef yixxamen ad ajemɛen timellalin d tgella nniḍen, tayeḍ d ttḍila i warrac…artg.

Aseggas ameggaz i Yiqbayliyen d Teqbaylin anda ma llan.

Djidji Nait