ɣas akken iɣab ɣef wallen ass-a, maca netta ger-aneɣ mazal-it, s isura neɣ s tira, ayen yexdem i teqbaylit d ayen ur yettagi “ceffu”. Yak isem-is “ceffu” amek i tram ad t-nettu?
Tawrirt mi nruḥ ad tt-nettu, s usaru d anza i tuɣal i teɣri, tiɣri-nni n weẓru, anza i d-rrant tɣaltin akked tewririn d awezɣi ad t-nettu.
Talalit-ik di furar, ger uḥeggan d umrḍil, di taddart n Uzelagen. Di teqseḥ n usemmiḍ, i d-telddiḍ allen, allen-nni ur teqqineḍ ɣef wid yenɣa usemmiḍ.
Isem-ik ger wiyaḍ yufrar, asmi i t-cerḍeḍ s ufus-ik deg umezruy n teqbaylit. Tecbiḍ ifrax n unebdu, iteddun melba akukru ɣas deg wayla n iṣeggaden.
S isura i terẓiḍ isula, i telddiḍ tiwwura, tiwwura-nni id d-rran fell-aɣ wid-nni.
Tawrirt yettwattun yura umusnaw am tmacahutt i nessarem ad tiɣzif am usaru, kečč terriḍ-tt d asaru, d inigi, d lǧǧera iḍefren tikli i d-icergen iḍ n tatut.
ɣas ulac-iken tellam, i tudert teǧǧam-d inagan ara d icehden ɣef tlilit-nwen. Ma yella d wid i yeqqaren:” imaziɣen ur llan” teẓram amek igan, teẓram d acu ibɣan.
Di furar i ak-yeḥbes waṭṭan tikli, di furar targit-ik ur teḥbis tikli. Targit-ik terna ɣer tirga nniḍen, tirga yesdermen iɣbir n tkarkas, iɣbir n lbaṭel n tatut akked lmut.
Ur temmuteḍ ara a Bugarmuḥ, ur temmuteḍ ara a Bugarmuḥ.
Irnaten Murad
