Aseggas yettarew-d wayeḍ

0

Ad nettu iḍelli, ad neckunteḍ deg ass n wass-a akken ad nheggi azekka.
Ilaq amud n tebɣest akken ad yuɣal wakud d allal ger ifassen n umdan.
Win izmren i wannect-a iga asurif meqqren ɣer tussna n lesrar n ddunit. D acu i d lawan, amek yedda umdan yid-s? D tuttriwin iceɣben amdan di yal tama n ddunit di yal tagnit di yal lawan.

Yenna Lunis:

Kul lqern yurǧa lehna,

Waqila abrid-is yenneḍ.

Kul mi ara yekfu usseggas, nettmbudu wayeḍ yifen win yezrin. Di yal
tallit di yal tamnaṭ di yal timetti akka i yella lḥal. Lameεna d acu-t wakud–agi wuɣur nccud asirem-nneɣ neɣ asḥisef-nneɣ?
Yeqqar Paul-Jean Toulet: “akud yettεeddi. Ah! lemmer nezmer ad t-nwali amek yettezririg, yettensar gar iḍuḍan-nneɣ. Lemmer nettmeyyiz akud di
tilawt yetteεeddi , nekni nedda yid-s.” .

Amdan iccud ɣer wakud. Yezga d tadla deg yimi n lawan. Deg uḥric–agi yenna Lunis:

Lweqt yettεeddi

Nekni nettawli-t

Muḥal ad d-yezzi

Leεmer yattawi-t

D acu i d lḥal? D acu i d lawan? Amek ara d-nenser i tuccar-is ? D tigi
i d timsal i iceɣben imeyyazen seg wasmi i d-yexleq zzman:

Aggim-a yebda s ṭraḍ

Icuba wid iεeddan

S uɣurar yesnerna fad

Ttmeǧǧiden wid yelluẓen

Ṣwab mi nɣil ad d-ibedd

Assa deg-s ur d-yeclig ḥedd

Yenerna lbaṭṭel ɣef lefsed

{{Amek aken?}}

Tikwal amdan yettru , yesḥissif ɣef lweqt yezrin am wakken kra yellan
deg tebḥat n yiḍeli yelha yezdi. Am akken kra akk εzizen yeffer deg yiciwi-s, yebleε yid-s. Tasa-s tettru ɣef yiḍeli, tettmeni amer ad d-yuɣal. Lameεna deg yixef-is , yura leɣrur, imi yeẓra belli ayen-nni d awezɣi :

Susem ay ul-iw i d-yettmektin

ayen akken I iεeddan, yekfa.

S wurfan yettwali belli akud d netta i d sebba n uhudu n kra yebna, n kra yasarem, n kra wuɣur yezdew lebɣi-s: “Aṭan n temẓi d ussan”, i immeǧed Maεtub s wurfan. Tikwal diɣ, yettban am wakken deg yifer n lawan i yezdeɣ udem n talwit. Dɣa, d lǧerra n wannect-a nettqelib ɣef lweqt ajdid, win ara d-yessersen lebɣi ɣer irebawen-nneɣ:

Ah ya lwaqt ajdid

Eyya-d ɣafer-aneɣ

Ad as-nefk i umɣid

Amḍiq gar-aneɣ

Ger imeṭṭi ɣef yeḍelli, d ufilet ɣef uzekka ara t-yiffen, allaɣ yemlleli. Amdyaz yenna:

Ul-iw la yereggel i ujdid

Yerna yeɣunza aqdim

Azekka mazal-it bεid

Iḍelli yedli-t lɣim

Ass n wass-a ikcem-it sḍiḍ

Yeggul di tasga ur yeqqim

Ihi am wakka nettwali akkud d rreḥba n wallaɣ. I tidet, d kra yellan i-yettfaten, nekni nettεuddu d netta i yettεeddayen. Daymi tuzzma ɣef lawan tella. Daymi yedda usḥisef di later-is.

Saḥa ya lweqt aɣeddar

Win i d aɣ-yesserwan lhemm

Me nesber neẓra nenṭer

Me neḥmeq neẓra neḍlem

Ur aɣ-yenfiε ma nehder

Ur aɣ-yenfiε ma nessusem

Kul yum fell-aɣ d aḥebber

Amek akken-nni ara nexddem?

Ay ansi i d as-yekka, ad yaf iman-is yettwerhen gar lemwaj-is. Ur yezmir
ad ibeddel iḍelli, ur yesεi tazmert ad iwehhi azekka, ur yesεi lqedra ad yesseḥbes ass-a. Ussan la zerben ḥemqen i d-yenna Matoub. Urar n
wussan d amcum. Yenna umedyaz:

Ay ass-a anida a terreḍ ?

Iḍelli anda i d-tegriḍ ?

Azekka ansi ara d-taseḍ

Deg uslazekka i k-id-tennejliḍ

Mi tneɣlem d iεamuren

Amezruy i wen-nsemma

Cubaɣ-ken ɣer ikufan

Irden-nwen d tilufa

Ur ttenɣasen ur ttfakken

Acḥal teččam deg qeǧǧa

Akka, i d amadan akka i d lawan. Wa yetccekib deg wayeḍ.

{{Awal annegaru?}}

Am wakken id as yenna Maεtub:

Yenεalbuk a lḥif

I d aɣ-yeǧǧan di rrif

Ur nezmir ara!