Asirem s ucemmer iɣallen

1
asirem
asirem

Anwa ur nessaram ara ayen yelhan i tmeddurt-is? War asirem aṭas n yemdanen ad ddren d isellawen, tameddurt-nsen tezmer a sent-uɣal d tarzagant. Nekni s Yizwawen, s Tezwawin nessaram a nedder d ilelliyen di tmurt-nneɣ. Atan d acu i ɣ-yeǧǧan nessaram:

  • Asirem d imawlan i d-yeskarayen tarwa-nsen s idles azwaw, s tutlayt tazwawt akken tebɣu tella tmara, anida bɣun ddren!
  • Asirem d Yizwawen/Tizwawin yettaken ismawen imaziɣen i tarwa-nsen.
  • Asirem d idlisen, isura d wayen-nniḍen i d-iteffɣen s tezwawt neɣ ɣef tezwawt. Imura s tezwawt ɣas ẓran idlisen-nsen ur ttnuzun ara akken yessefk ad nzen, maca ur brin ara i ṭṭbel deg waman, ttkemmilen tira s tutlayt-nsen tayemmat.
  • Asirem d Linternet anida tazwawt ɣur-s amḍiq-is. Isalen s tezwawt, ɣef iɣeblan-nneɣ, ɣef wayen yelhan di tmurt-nneɣ zeggren tilisa, ttawḍen ɣer yal tiqernit deg umaḍal.
  • Asirem d tarwa tazwawt i d-yekkren umnen s yiman-nsen d aɣref i llan, yernu ddren s tira n tutlayt-nsen, war ma ttun tutlayin nniḍen.
  • Asirem d ilemẓiyen/tilemẓiyin i cerrwen tidi ɣef izerfan-nsen deg weḥric n tsertit.
  • Asirem d imezdaɣ n tmazɣa yeqqaren d imaziɣen i llan, ɣas ur tmeslayen ara tamaziɣt. Annecta yezmer a t-yamen yiwen ma yella di tmeddurt-nsen ur ttcekkilen ara tikli i tmaziɣt. Mačči ad qqaren kan d Imaziɣen i llan i wakken ad sɛun azref ad rekḍen tamaziɣt.
  • Asirem d kra iberranyien yettarun ɣef idles azwaw/amaziɣ.
  • Asirem d Izwawen/Tizwawin yeqqaren: “Nekni ur nettruẓu ur nkennu”.
  • Asirem d tukksa n nnif-nni n twaɣit.
  • Asirem d tilawin tizwawin yettazzalen ad sɛunt izerfan i sɛan yergazen.
  • Asirem d irgazen i yettbeddayen ɣer tama n tlawin yettnaɣen ɣef izerfan-nsent.
  • Asirem d irgazen d tilawin yettqaḍaren izerfen n warrac.
  • Asirem d asmekti n tefsut tamaziɣt n 1980 d tefsut taberkant n 2001/2. Asmeki-ayi yessefk ad yefkk tazmert i tarwa n tmurt-nneɣ, i wakken ad tkemmel tikli ɣef izerfan-nneɣ.
  • Asirem d icennayen-nneɣ, d imedyazen-nneɣ i yeskikiḍen, yessergigayen ulawen
  • n tarwa n tmurt, i wakken ad tezlez iman-is ad teddu deg webrid n tlelli.
  • Asirem d imusnawen/timusnawin-nneɣ i yixeddmen di yal aḥric n tmeddurt.
  • Asirem d yad/tid yeqqaren nuklal tura yakan tilelli, mačči azekka.
  • Asirem d Izwawen yeqqaren, yessefk a nezwir a nesbedd awanek di tmurt-nneɣ, maca war ma nsekker tiwwura-s ɣef yad ur nelli d Izwawen.
  • Asirem d Izwawen yettaken afus i yal Azwaw, neɣ i yal amdan, anida yeɣbu yili, ma yella di tmara ur nelhi.

D acu kan asirem war acemmer iɣallen ɣef izerfan-nneɣ yezmer ad yeqqim kan d targit ur nteffeɣ!