Asmekti n tmettant n Sliman Ɛazem – Yeǧǧa tamurt-is mebla lebɣi-s

4

Sliman Ɛazem,illul ass n 19 di ctember 1918, deg taddart n Aggni Geɣran. Yekka-d deg yiwet n twacult d taẓawalit. Baba‑s yella d afellaḥ d igellil, ɣer‑s semmus n watmaten akked snat n tatmatin. Temz-is yesɛedda-tt akken i ttesɛaddayen warrac n tudrin merra.

Isem-is ɣer medden d iṭij ma ara a d-yebru i tafat. Isakkay-d wid yeṭṭsen, akken ad fiqen d yiman-nnsen ad ssutren izerfan-nnsen. Ttawin-t medden d amedya n lefhama, ttemyuzamen s isefra-s, ttmeɛɛinen s tuɣac-is. Yal taɣect ttaran-tt medden d asafar i tattut n wučči di lawan n ccer. Imeslayen-is kkaten s aqerru, nettun deg ul. Yefka azal i usefru war ma iceḍ-as wawal. Tuɣac-is sellen-asent at wexxam mebla leḥya !

D netta i d bab n ccna aserti n Teqbaylit. D amezwaru yesqedcen timɛayin n iɣersiwen akken ad yeṣṣiweḍ izen ɣer Iqbayliyen. Di lawan n ṭraḍ yecna ɣef lbaṭel n umnekcam, yenna:  » Ffeɣ ay ajraḍ tamurt-iw ». Syin Ḥermen tuɣac-is deg umaṭṭaf n teqbaylit di tamurt. Yettɛedday-d deg umaṭṭaf n Lpari yal ass. Ittekki deg wegraw Imaziɣen anda yecna :  » weyyak a Ḥmed » yewwitt-id ɣef wid yettfen adabu di ltallit-nni. Asmi yehbes umaṭṭaf n lpari yuɣal i cennu di leqhawi.

Deg iseggasen n 77 yexdem anezgum netta d Ccix Nurdin. Taɣect-is zeddiget, aẓawan-is d afessas, imeslayen-is d taqbaylit. Icna ɣef tmurt-is yenna:  » a tamurt-iw ɛzizen ». Di tefsut n 80, yecna » A teqbaylit a tigejdit a tin ɣef yebna wexxam… ». Icna diùen ɣef lɣerba tamcumt, tin ihuzan akk Iqbayliyen, d wamen tettaker irgazen s twaculin-nsen:  » d aɣrib d aberrani di tmura n medden ». Dda Sliman yewweḍ leɛfu n Rebbi ass n 28 yennayer deg useggas n 1983, yemḍel di Moissac di Fransa.

Yessarem ad yemmet di tmurt n yeqbayliyen i t-id-yessekren alarmi yewwed d argaz; tagara yemḍel d aɣrib !