Ass-a n 22 Meɣres ara tebdu tfaska n tmedyezt tamaziɣt i d-tessudus tiddukla tadelsant Adrar n fad deg At Smaεel d tajmilt i dda Lmulud At Mεemmer s tallelt n terbaεt n ccna Taqbaylit ABRANIS.
Azal n kraḍ n wussan i deg ad mlilen wat wawal deg uṭun wis mraw n tfaska-yagi d tagnit i usqerdec s wawal ɣef wawal ladɣa nnig 150 imedyazen ara yekkin deg temsiselt ddaw tseqqamut n inefrayen ɣef uqerruy-is mass Kamal Buεmara d aselmad deg tesdawit n Bgayet.
Aṭas n yisentalen i ɣef ara d-ilin isaragen ama ɣef leqdic n dda Lmulud » Tawrirt yettwattun « , » tamedyezt n yibeddi di rrif », » tamedyezt s Tmaziɣt « , » amawal amaynut deg tmedyezt Taqbaylit « .
Deg tefgult n taggara d tarbaεt ABRANIS ara yeṭṭfen lwelha s tmeɣra ara texdem deg uxxam n yilmeẓyen n At Smaεel.
I usmekti, am leεwayed-is tiddukla, ur tettεedday ara tfaska nebla ma tesnubeg ladɣa aseggas-a si Qser ccellala di tama n Lbeyyed.
Azal n 3 wussan-agi ad d-nettuɣal s kra n yisallen, tugniwin akked idiwenniyen.
