Ccṛeɛ n sin yeqbayliyen ur d‑yelli ara – At Micli ur kennun i lbaṭel

8

Ḥ. Ḥ. (47 iseggasen) d S. F. (34 iseggasen), d ixeddamen deg yiwen ucanṭi, deg Micli, tejba-d fell-asen temsulta tessen tiqqit n waman deg tlemmast n remḍan, teṭṭef-iten. Ar deqqal imi ten-d-sneṭqen deg lkumisariya, ipulisen sεeddan-ten s lemɣiwla ɣer teɣdemt. Imi slan s taluft-a, kra seg yimezdaɣ n Micli ssawlen-d ɣer unejmuε sdat n wexxam n teɣdemt i wakken ad d-ilin ɣer tama n watmaten-nsen.

Lezzayer i yestenyan zeεma kra yellan d asaḍuf yellan di ddunit ɣef izerfan n wemdan txeddem-d isuḍaf ara iḥettmen i yemdanen yiwen kan n ddin. S wanwa azref i d-tugem aya? Ula d tineslemt, iɣef zeεma tesḥerbib, ur d-tenni ara akka. Tineslemt, tin is-s umnen imawlan-nneɣ, ur d-tessekcam ara iman-is imi ara ferrun Yeqbayliyen tilufa-nsen deg tejmaεt.

Ass-a, leḥkem amesbaṭli n Lezzayer ixeddem ayen akk iwumi yezmer i wakken ad yekbel Iqbayliyen, ad sen-yekkes taqbaylit n lejdud iɣef d-gman, taqbaylit n usuref, n tlelli, n lemqadra d yiseɣ. Iṣerref tadrimt meqqren i wakken ad yeẓẓu deg tmurt tineslemt n seddaw walim, tin n wat ičumar yessnen ala ajenwi, idammen d temḥeqranit, yesselmaden ala lekruhiya n wayeḍ akked wayen akk ur nemεin, tin i d-yeskarayen imenɣi ger sin watmaten.

Tineslemt-a ugint Yeqbayliyen seg zzman aqbur, ur tuɣ aẓar deg yiman-nsen, ur cukkeɣ ad d-taɣ-it. Γas akken, d tidet, llan kra seg Yeqbayliyen fkan afus, sburren idles aεrab-ineslem, nekren ayla-nsen ssedḥan yes-s, maca drus maḍi, ur zmiren ad beddlen iman aqbayli, win yessawḍen yezger-d d igimen iseggasen wer ma ibeddel-it Umezruy. Aqbayli skud yella, skud yedder ɣef wudem n lqaεa, tilelli d wezref ad zedɣen deg-s i lebda. Γas yettεedday fell-as uzaylal tikwal, maca yezga yettaki-d, ur yettsemmiḥ deg teqbaylit-is.