Ccwal ɣef tmezgidiwin d leǧwameε deg Tmurt n leqbayel

3

Deg taddart n weɣrib d tajmaɛt n taddart i yesdermen lǧameε amaynut i wumi tekker s lebni yiwet n tiddukla tadeyanit n taddart agi. Snat n tedyanin agi ahat mgaradent deg waṭas maca ad yili wayen ara tent yezdin.

Taluft n usraɣ n tmezgida “tafat” d ccwal aḥerfi i s ara yessetḥi yal win yettasmen ɣef lεerḍ-is d tnekkit-is. Maca afus n udabu d ihuẓiyen inselmen iban yetteka. Mačči d tiklet tamenzut i kkren ɣer ccwal. Tin ɣer-s, adabu n lezzayer, isereḥ-asen ad kemmlen ayen yebda netta s timmad-is aseggas yezrin. Ilindi, amaḍal akken ma yella yesla mi ḥebsen tamsiwt nni n Tyaret imi tewwi yid-s n yenǧilen n imasiḥiyen.

Tadyant n taddart n weɣrib temgarad kra. Tajmaɛt n taddart, terfa imi arbaε agi n tidukla, ur tt-cawren ara. Nettat tebɣa ad seggmen lǧameε aqbuṛ n taddart, nutni ttnadin ad ssalin amaynut ara d yezgen beṛṛa n taddart u beṛṛa n leεnaya n tejmaεt. Tuddar n leqbayel akka i teddunt deg zik, d tajmaɛt i tent-iferrun. At tuddar qqaren “aεekkaz yewwten taddart, awer d-iyi yezgel.”

Maca snat n tlufa agi, yella wayen tent yesdukklen xas ulama mgaradent. Tuddar n leqbayel, ur sεint ara aɣunzu yecban wagi, yettawin ar usizzel n idammen d usraɣ.

Taggara agi aṭas n tuddar i deg d-yella ccwal d umgarad ger imezdaɣ ɣef lebni n leǧwameε. Kan akka a d tesleḍ sin neɣ kraḍ gan asenfar i lebni n lǧameε. Imir taddart ad tebḍu ɣef sin. Kra qqaren : “Nekkni nebɣa taẓallit”, kra qqaṛen : “ Mačči d aya i yezwaren ”.
Maca afus d yekkan ansi nniḍen yettbin. Tuddar n leqbayel yesqummec lḥif d lqella n uxeddim d wallalen n tmeddurt, uɣalent akk s leǧwameε. Laẓ tingaẓ, ma d kra ur walan ara tiwaculin yenḥafen, ur nessawaḍ ara a d-aɣent ayefki yal ass i warraw nnsent yttimɣuren s tmara. Acu i k-id-iṣaḥḥen ay aqbayli d lǧameε.

Maca taluft tameqṛant akk deg waya d taṛuẓi n leεnaya n wedrar d tuddar i wumi kkren wigi. Win yeffɣen i taddart, m’ur terrin ara s amkan-is d netta ara yessufɣen taddart. Tidyanin agi sbegnent-d d akken adabu d wid t-id ittalen qesden tura ad gren targit ar yiciwi n Tmurt n leqbayel akken ad yekker ccwal ger tuddar.