D acu i d-yegran tura?

1

Azul
Deg talwit d usirem i nqubel Yennayer wis 2960, i ɣ-d-yeǧǧa Ugellid-nneɣ Cacnaq d asmekti n wasmi yerna Iferεunen. Ilmend n usmekti n umzruy-a amaziɣ, aɣmis tamurt.info, aseɣwen-nwen amaynut d tmurt n Yeqbayliyen, yessarem-awen aseggas ameggaz ara wen-d-yeglun s tezmert akked d tumert. Tarbaεt i iqeddcen deg-s tessaram-it seg ul-is d aseggas ara d-yerren deg-neɣ littkal i nettkel ɣef yiman-nneɣ, i wakken ad neṭṭef i lebda ṣrima n twenza-nneɣ.

I wakken asirem-a ad d-yeḍru, neẓra yakk belli ilaq ur nettarra ara ccan i wayen i ɣ-ibeṭṭun, ilaq ad neẓret anida i tecceḍ tsertit i d-newwi ar tura, aya xerṣum ilmend ilmeẓyen-nneɣ i yettargun Tamurt n Yeqbayliyen n yiseɣ akked tdukli. Fiḥel ma nεeṭṭel aṭas deg iɣelluyen-nneɣ. Sebba-nsen ur d-tekki la seg yihwah-nneɣ la seg kennu-nneɣ, ma yella dɣa nekna. Yiwet kan n twaɣit i nga, ass-a nxelleṣ-itt ɣlayet, d aḥettem i nebɣa ad nḥettem I Yizzayriyen yakk tudert-nneɣ d wansayen-nneɣ i d-nugem seg yidles-nneɣ aqbur: azal meqqren i s-nefka i tlelli, i tugdut akked usuref. Timura i ifernen ad idiren s waya, imezdaɣ-nsent rwan, leḥḥun deg ubrid mebla lxuf, uɣalent-asen d lǧennet. Dɣa, imleẓyen-nneɣ d lǧennet-a i ibeεden i ttargun iḍ d wass, ssawḍen almi ttaεraḍen ad tt-awḍen s teflukin ur neǧhid, ɣas akken d lmut i ten-yettrajun.

Ass-a, Tamurt n Yeqbayliyen mazal tettkemmil amennuɣ-is. Teẓra belli ur tesεi d acu ara texser imi tefren abrid n timanit. D nettat kan ara ad yesḥirbeben fell-as mgal adabu i s-yesserwan laẓ akked qeḍran i wakken ad tt-yesseknu i lebda. D acu ara ɣ-yeḍrun sennig n twaɣit i nettidir akka tura? Amek ara neqqim d nniyat sdeffir wayen yeḍran deg tefsut taberkant? D acu n wudem i yesεan kra seg Yeqbayliyen, yenzan s yidrimen yexnunsen neɣ iwumi ssulin cwiṭ deg umkan, mazal ttkemmilen bɣan ad ɣ-ssimnen s tsertit n ukeččum ɣer leḥkem s tefdent, akken s-yeqqar Maεṭub (ad yesteεfu deg talwit), Ttun yakk lexsara tameqqrant n RCD deg 2000. Mačči d ayen ifessusen ad yettu yiwen tukksa n sser i s-kksen εinani, zdat medden yakk, i ukabar-a yettxellisen ass-a tiεuggent-is n yimir-nni. Amek ara neqbel akemmel deg tsertit-a ur yessufuɣen, i mazal ssuturen kra n iqemqumen iqbayliyen? Tiɣimit i neqqim deg umni (APN) n lezzayer, nreffed ifassen-nneɣ nesrusu-ten, mačči d aserrus i d-nesres Tamurt n Yeqbayliyen ɣef sniwa n lfeṭṭa i win i s-yettnadin tamettant? Aṭas isteqsiyen i yellan, smektayen-aɣ-d inzi-nni i d-yeqqaren: Neṭṭamaε udi deg uḥuli.

Targit ur d-iḍerrun, ṣber, asεeddi deg wakud dayen ur sen-d-yeqqim kra, wwḍen-d ɣer tlisa-nsen. Ass-a, asuter n useḍru s tɣawalt n timanit i Tmurt n Yeqbayliyen yuɣal d tamsalt n tirrugza d yiseɣ. Nettmeslay ɣef timanit n tidet. Tinna akken ara ɣ-isellken seg txidas n wat ulawen iberkanen, ara ɣ-yessufɣen i lebda seg tsellalut taεrabt-tabaεtit, akked takna-ines tineslemt tasertant. S timanit kan ara d-naf iman-nneɣ swaswa d umezruy-nneɣ, yes-s kan ara nessiweḍ ɣer uzekka n talwit, win ara ɣ-d-iḥellin amkan nuklal deg umaḍal. Ur yessefk ad neqmec tiṭ-nneɣ, amaḍal n wass-a ur yettrǧu ara.

1 COMMENT

  1. Ikabaren-ayi ghef acu i d-tettmeslayèd atnan kkaten abèhri s uàazày ! Ma yella stàarfen d-akken yella YEGHREF AQBAYLI,abrid-nsen iban !.Ma yella mazal a d-qaren d-akken ULAC aghref aqbayli,ihi ad kemlen ad ttnaghen mgal TIMANIT magal tlelli n tmurt n Yeqbayliyen ,ad nraju ahat a gh
    d-awin « Lezzayer tamagdayt tilellit », asmi ara d-inewwer lmelh’.

LEAVE A REPLY

Please enter your comment!
Please enter your name here