D acu i s-d-yettheyyi akka udabu i Tmurt n Yeqbayliyen?

6

Smana-a taneggarut, Tamurt n Yeqbayliyen tezga tettuɣal-d ɣef yilsawen n wat udabu. Ssefhamen-d isenfaren i s-d-heyyan. Aɣlif n teɣdemt yenna-k sya ar yunyu i d-iteddun takurmut neɣ leḥbes meqqren nezzeh, ara yawin nnig n wagim (1000) imeḥbas, ad yili yuli deg tama n Wed Γir, sdat n temdint n Leqṣer deg Bgayet. Ma d iǧadarmiyen mmeslayen-d ɣef uɣawas-nsen n tuɣalin ɣer Tmurt n Yeqbayliyen, segmi tt-ffɣen deg 2002-nni, asmi akken i yenɣan nnig n 120 d Aqbayli. Iḍelli nnan belli sya ar taggara n useggas 2010, adabu ad yekfu lebni n 29 n lkaẓirnat deg temnaṭ kan n Tizi Wezzu, i yiman-is. Aya d tazwara kan. Iswi-nsen ad ssiwḍen ad sbedden yiwet n lkaẓirna deg yal taɣiwant. Tura, εlaḥsab n wawal-nsen, iǧadarmiyen llan ala deg 45% seg Tmurt. Rnu ɣer waya, ad d-ččaren Tamurt s ṣṣenf nniḍen n yiǧadarmiyen i izemren i kra yellan, i d-yeɣra ɣer GIGN n Fransa. Akka tura, llant ala 09 n trebbuyaε deg-sent bdant lxedma deg Tmurt n Yeqbayliyen.

Deg lawan anda Tamurt mazal tettettru ilmeẓyen i s-nɣan, i s-εeyyben, tettraju melmi ara sen-d-yuɣal uzref-nsen, wid yenɣan ad xellṣen, tettraju ad d-yeḍru wayen d-tessuter, adabu yefren ad s-yernu taɣuzi i udeddic, i wakken ur iḥellu ara i lebda. Γer-s, at Tmurt n Yeqbayliyen yakk d irebraben, d at tmegraḍ, d imukar neɣ d imdanen iɣef ur yessefk ad yeqmec yiwen tiṭ-is. Dɣa ɣef aya i yettṣerrif idrimen n Lpiṭrul d wid i d-iḥawec seg tebzert ala deg iṣenfaren n teɣlist (taɣlist-is netta, mačči tin n Yeqbayliyen). Daya kan i tuklal Tmurt n Yeqbayliyen: d leḥbus d lkaẓirnat. D wa i d lxir i s-yuɣalen i tmurt-nni i d-yefkan 2/3 seg umelyun d uzgen n yimeɣrasen (900 000) ilmend n timunnent n Lezzayer. Waneg isenfaren nniḍen, d timnaḍin nniḍen kan i ten-yuklalen. Abrid ameqran n tkeryas Asamar-Amalu yezgel biεmada Tamurt n Yeqbayliyen. At tedrimt yebɣan ad xedmen deg Tmurt n Yeqbayliyen, xellqen-asen-d iɣeblan i wakken ad sseftin tadrimt-nsen anda nniḍen.

Ass-a Iqbayliyen uɣalen almi ttemyennan deg ugara-sen “tamurt-a ur tesseččay ara aɣrum”, seg lḥif i ten-yenɣan. I wakken ad d-afen axeddim yessefk-asen ad d-ffɣen seg Tmurt-nsen. Mačči ala aɣrum i s ulac deg Tmurt-nsen. Kra yellan ixuṣṣ-itt. Ma yuḍen yiwen yessefk-as ad yelḥu aṭas, alma qrib ad yemmet sumek ad yemlil d umjjay, dɣa fiḥel ameslay ɣef wallalen n sbiṭarat. Iberdan yakk n Lezzayer ttwaxedmen, wid n Tmurt n Yeqbayliyen mazal ččuren d tifawtin d yimdunen. Ma yebɣa yiwen ad d-yexdem kra n lkaɣeḍ yessefk-as ad yelḥu aṭas daɣen i wakken ad yaweḍ ɣer wemkan, yerna ad ssizilen deg-s alma yendem yakk deg wayen akken i yegmen ad t-yexdem. Ayen iɣer iεedda yiwen ad yaf tiwwura nedlent. Yiwen ur yufi iman-is. Wid ur nessaweḍ ara ad zegren lebḥer, ttnuɣen deg yiman-nsen. Dɣa Tamurt n Yeqbayliyen d tamezwarut, tusa-d ɣef tqacuct n tmura anda tuget timenɣiwt n yiman.

Ass-a Tamurt n Yeqbayliyen kra yellan ixuṣṣ-itt. Ur txuṣṣ ara ala deg tissit d lehyuf, ini-d kan, llan s tuget. Ur txuṣṣ ara deg leḥbus d ibaraǧen n lεesker d yiǧadarmiyen. Dɣa anda i terriḍ ad ten-tafeḍ, ad s-tiniḍ d lεesker-nni n umnekcam arumi deg lgirra-nni n 54. Yerna d acu i d lxilaf yellan ger lεesker n Fransa n yimir-nni d win n Lezzayer n tura? I sin qqaren-d “aql-aɣ da i wakken ad nesḥirbeb ɣef teɣlist n yimezdaɣ”.. Ma d tilawt d ayen nniḍen..Wissen ihi d acu i d-yettheyyi akka udabu i Tmurt n Yeqbayliyen?