D acu-t ubaxix agi ?

4

Winna yeḍmeε azekka ad tbeddel yir targit fell-as. Ziγ yeγleḍ di leḥsab-is, acku mazal yeṭṭafar lexyal n win iḥemmel am tayri-s. Atan ihi teckunteḍ deg-s yir targit am innijel izedγen tamazirt yeqqimen d asuki.

Tamurt-agi tuγal d lbuṛ. Yal tikelt ara neḍmeε tufγa γer luḍa, ad aγ-d-imager yiwen ugejdur yettγumun fell-aγ tafat. Akken i as-yenna winna n zzman: »Yiwen yeγli-d wefwad-is, wayeḍ yeqqar: « Awi-d ad skenffeγ « .

Ma d tifranin teddunt-d Ay Aqbayli, tudert i tmurt n yeqbayliyen! D tin i d tamurt n tugdut. Atan At ufella ṭṭfen deg wawal-nnsen akken ad sεeddin tifranin-nnsen ara aγ-yerren kra n iseggasen γer deffir.

At Ufella swejden-d lbuṭ i tagara n wamber-agi, ass-nni kra ur iferru ad qqimen kan deg libuṭ. Aqbayli-nni yugi tifranin agi. Ma d At ufella, nejmaεen msersen, mqalaεen. Γef iqerra-nnsen d win akken yesselḥan tamurt s lbaṭel iseggasen-aya ara ittḍebbiren γef wid ara yiselhun tiγiwanin.

D acu-t ubaxix-agi? Tamurt-agi tleḥḥu γef uqerruy-is. D ayen ifuk ṣṣwab imi d winna ara yiḍebren γef tamurt n yeqbayliyen; fran-tt γef iqerra-nneγ, ad bḍun wagar-asen tizeγwa n tγiwanin anda i d-yettlal yal lɛar. Aqbayli-nni, yefra-tt d yiman-is. Yeẓra ur d-ttili ara tifrat i wayen i t-yuγen si Lezzayer tamanaɣt.

Aka i d irgazen yettmeyyizen, ttxemmimen ttafen-d tifrat! Tifrat, atta-n di tmurt n yeqbayliyen. Uqbel tifranin, neγ mbaεd tifranin, Aqbayli yeẓra d acu ara d-ilalen? Tikerkas d texnanasin…d lbaṭel!

Ammer d Aqbayli-nni n lḥer i d-iḍḍer wawal ur nkennun ur nettruẓ, ad yefk akk ayen γlayen fell-as akken ad yemḥu lbaṭel! Neẓra akk d acu i d-iḍerrun di tmurt n yeqbayliyen. Mačči d yiwet, ad tt-id-ibder wemdan.

Aqbayli yeẓra tamurt laqen-as yergazen, ilaq-as wegdud, tlaq-as tutlayt, tilelli akked tugdut uqbel kulci.

Ayagi i yeǧǧan Aqbayli yuḍen seg wayen yettwali. Yettwali imdanen ttazalen deffir leḥkem amesbaṭli.

Wid-nni yekkan yid-sen qeblen tamurt-agi ad telḥu γef yiwen n uḍar.

Crif Wanuγi