D netta, id-yennan : « yif xir aεdaw n wass-a, wala win uzekka ». – Lmulud n At Ceɛban (Mulud Ferɛun) : D Aqbayli d argaz

5

D argaz yelḥan ɣef isennanen n wakal yerɣan armi ṭreḍqen idarren-is d idammen, wid s wayes yeswa wakal-is. Yeffeɣ-d yiwen yemɣi zegzawen I d-yefkan tilelli ɣef ɣlin acḥal n imeɣṛasen. Tilelli yessarem acḥal, iruḥ ur s-yeḥḍir. D argaz yuran γef teqbalit-is, taqbaylit icudden ul-is d uzar-is, taqbaylit-nni i t-yerran yettaru s telqay. Akken a d-yesken ccbaḥa n tmurt n Yiqbayliyen, tin ara d-yeflalin ger tmura. D argaz yuran ɣef tlelli n tudert d yiles. D argaz yugin ddel d temḥuqranit…

Tira-s terra tasekla tazzayrit γur-s azal di tmura. D argaz, ibedden zdat n wuguren n ucengu afransis, arumi-nni yettmuqulen tamuɣli n wuccen s ulli deg-mi yugi abrid n txidas… yugi ammus n ubernus i d-as d-ğğan leğdud-is. Acengu yesgujlen iɣerbazen, yeskawen allaɣen n watmaten-is. D win yewwin abrid n tira n tezdeg id-yemlen telqey n tiktiwin-is, tikta yezzuzufen tillas tid yemmalen abrid iberzen win yettawin bab-is ɣer tissas. Wa, anwa-t wa, d Lmulud n At Ceɛban, d mmis n ugellil. Ilul deg useggas 1913, di Tizi Hibel (At Dwala).

D aqbayli, yemmut d argaz, ur yekni, ur yeṛṛiz. Yebges s tissas i waken ad adyessuffeɣ laẓ d lmizirya deg wallaɣ n watmaten-is yettidiren ddaw uzaglu afransis. Yefren abrid n uselmed d usegmi akken ad ileqqem tamussni i warrac di lakul, ad yessiweḍ ayen yelmed d wayen yessen i watmaten-is iεetben aṭas ddaw warkas n umnekcam . Dɣa ɣef waya itenɣan irebraben n “l’oas” ass nni n 15 di meɣres 1962, di “Chateau Royal” n Lebyar netta akked xemsa n yimdukal-is, tlata n wussan seld-timlilit-nni n “Accords d’Evian”. Yettaru s tefransist maca tidmi-s s teqbaylit, yesnaɛtay-d idles-is deg i d-llint wallen-is. Inna-d s yimru-ines ala i temḥuqranit d lḥif…. Ayen yura : Mmi-s n ugellil (1950), Akal d yidim (1953), Ussan di tmurt (1954), Iberdan yessawnen (1957). Tikti n yidlisen agi tezzi ɣef tmurt n Yiqbayliyen, uguren d-temlilen watmaten-is iqbayliyen, akked tedyant n lɣerba. Tamettant di yal ass, rsas, lbaṭel umnekcam, ayagi yennat-id deg weɣmis (1955-1662). Isefra n si Muhend (1960), tibratin i yimdukal-is (1969), amuli (1972). Mulud Ferɛun irfed taεkemt yerẓan ifadden-is, akken a d-yesken tafat i wtmaten-is, yunag fell-aɣ s tfekka-ines, yettidir gar-aneɣ s tira-ines.

{{Crif Wanuɣi}}