«Dacu ara nečč !»

3

Maca tineggura ya, smuzgtaɣ aṭas i izarugiẓriyen n Kibek (wid ittnaɣen akken ad
d-ḥellin azarug i Kibek) u ufiɣ tamsalt-a tella daɣen ɣur-sen. Zik llan bɣan azarug
akken ad seddun tamurt nsen akken isen ihwa u ad ḥarben ɣef udlis afransis di tgafa
n Marikan, akken ur ittili ara nnig-sen udabu afidirali n Kanada. Tagara yagi, zgan
ttawin awal ɣef tdamsa: “ad nawi azarug akken ur nettxellis ara aṭas n lmesk neɣ
n tebzart i udabu afidirali, ad d-nḥelli tamurt akken a nesnerni tabaɣurt n tmurt
nneɣ”. Ihi akka awal ɣef uzarug n Kibek ibeddel udem d ubrid. Ibda-d ɣef ubrid
iẓuran, yuɣal iṭṭef abrid n tdamsa. Atan ihi dacu iɣ-d-issawḍen ɣer «dacu ara nečč»
nni. D tadamsa. D tadamsa d ukukru. Ikibikiten bɣan azarug akken ad snarnin di
tbaɣurt n tmurt nsen, nekwni nkukra timanit acku nugad ad nellaẓ.
D tadamsa ihi i ɣur teqqen temsalt.

Umengellat inna-yas di tezlitt-is Tamurt
nneɣ : “azelmaḍ diri-t nugi-t, ayeffus nugad-it”. Ar uzelmaḍ neɣ ar uyeffus, atmaten
nneɣ kkukran, ugaden azekka. Ass-a ḥsan d akken mačči d adabu n Llzzayer
isen ittaken ayen tetten, maca ṭaqa n medden ttuqimen sya-u-sya u sεeddayen
tagwnitt. Ass-a ara asen neqqar ilaq ad nawi timanit akken a nesseddu tamurt nneɣ
s yiman nneɣ, akken iɣ-ihwa, s teqbaylit, s wansayen d leεwayed nneɣ. Nenna
yasen ad nidir di tugdut, di teɣdemt. Nenna yasen ad nessu tagmatt d tayri ɣef
tmurt nneɣ. Maca ayen bɣan as-slen, ayen irjjan asen-ten-nesseqcer d tamsalt
n “wacu ara nečč”. Deg imi nsen, dacu ara necc, iqqar-ed amek ara nidir ? Dacu
ara nuqem azekka akken ad d-nessis aɣrum i tarwa d twacult? Amek ara yili
wudem n tdamsa di tmurt nneɣ? Ad yili umahil i medden d tirni ? Dacu ilaq ad
tuqmen medden akken ad snulfun, ad ssalin imahilen i yiman nsen?

D tidett llan-d kra n wawalen sya-u-sya, ɣef taεkwemt n tebzert tettxellis tmurt
n Yeqbayliyen i udabu azzayri d kra n wawlan diɣen ɣef isenfaren ara d-yawin
tabaɣurt ɣer tmurt nneɣ uzekka. Maca drus. Iqbayliyen aɣ-d-qqaren mmelt-anaɣ-d
ugar. Innit-aɣ-d amek ara tebdu d wamek ara tekfu acku mačči d tikkelt i t-ɛedda
fell-asen. Mačči d tikkelt isen-tettwakellex.
Issefk ihi ad yili uskasi ɣef tdamsa n tmurt nneɣ seld timanit. Issefk ad ilint
temliliyin ama di tmurt ama di berra akken ad xemmen medden ɣef temsalt-a u ad
tt-sqardcen akken ad d‑afen iberdan n tafat i tdamsa uzekka.
Zriɣ tamsalt macci kan di tdamsa i tella. Maca, am aken d-nniɣ iwessawen, tilufa
nniḍen am taqbaylit d tameslayt nneɣ tunṣibt, taɣdemt, tilelli d tugdut imlal ṛṛay d
tmuɣli nneɣ fell-asent. Yiwen seg-nneɣ ur tent-yugi, ur tent-ikukra, ur tent-iɣunfa.
Banent-ed am yiṭij.

Ihi ilaq ad nelhu ass-a d tlufa i tesbundel tugdi d ukukru. Ilaq
ad nini i Iqbayliyen dacu ara ččen azekka, xas akken ar tagara am akken iyi-dinna
umeddakul-iw: ad ččen kan ayen ara d-ssisen, maca ilaq asen nini d acu ara
uqmen akken ad d-ssisen aɣrum. Ilaq asen-nesselmed amek ara d-snulfun imahilen
i yiman nsen d watmaten nsen. Asen nini amek, di tilawt, tabaɣurt n tdamsa
teqqen ar umdan d wayen ittuqim d isenfaren mačči kan dayen ittwareblen ddaw
tmurt am lpitrul d lgaz.

Issefk daɣen ad d-nesmekti atmaten nneɣ belli ma nugi ad nidir am ass-a, am afrux
iseččay baba-s, ilaq ad ncemmer iɣalen. Mačči d isenfaren d tiktiwin neɣ d tigatin
ara yilin drus azekka, d udem swayes ara ten-nmager ara ibedlen imal nneɣ d
yimal n tmurt nneɣ. S ubgas d uḥezzem ara d-nesnulfu tamurt nuklal. Tamurt n
Yeqbayliyen. Tina akken ifkan anzi ar ukanar ass-a di tfekka. Tinna akken ulac-itt
tella !

3 COMMENTS

  1. Ulac am in ara d-iḥelim aɣrum-is s yiman-is ama di Timanit neɣ di Timunent neɣ di Talwit neɣ di ddiq.
    S umaḥil kan ara tefaɣ akken ilaq dɣa ma narna-yas talwit di uqaddar, tenfel.

  2. Ilaq ad d-ner tamsal-agi n tdamsa ar gar wallen-nnegh acku ma ila-d urifirandum d medden ara yfarnen. ma illa ur fhim ara amek tili tudart azekka ad tadyeq taluft ghef timanit.

  3. d tidett taluft n weghrum tessaged imdanen seg akken tamurt n mhend azwaw d tamurt n wezru ,maca at zik qqaren: »tudert n talwit tif tawant » maca win yelluzen yettwali s yzerman macci s wallen.akken yebghu yili lhal adabu am win n letzayer yella lxir negh ulac yiwen-is agdud yezga yenhaf , daya le£rur ur llint tismin negh isegh iy izemren i uzaglu n tedrimt.

LEAVE A REPLY

Please enter your comment!
Please enter your name here