Farḥat Mhenni deg umaṭṭaf Tamurt: « Ma yella iqbayliyen ttikkin di tefranin, d affud ara rnun i udabu ameṣbaṭli « 

2

Aselway n Unavaḍ Uɛḍil, Mass Farḥat Mhenni, yella iḍelli ass n Lhed 25 wunbir, d inebgi n Karim At Karma deg umaṭṭaf Tamurt. Yemeslay-d ɣef waṭṭas n temsal ladɣa tid icudden ɣer yimal n tmurt n iqbayliyen, imal n timanit, d leqdic ara d yilin sya ɣer sdat i wakken tamurt n yeqbayliyen ad tawi tilleli i tettraǧu acḥal d aseggas, tilleli i ɣef mmuten acḥal d irgazen d tlawin.

Mass Farḥat yebda ameslay ɣef tefranin id d-yettheggi udabu azzayri deg 29 wunbir i d-iteddun, yenn-ad belli ma yella iqbayliyen ttikkin di tefranin, d ljehd neɣ d affud ara rnun i udabu ameṣbaṭli, d tesriḥ ara s-fken akken ad yernu kra n iseggasen ɣer sdat. Ma yella iqbayliyen ugin tifranin agi, ɣunzan-tent, aya ad yili d tiyita ara rren i udabu s wudem asartan. Acku afran d tidett d azref, maca deg tmurt n izerfan. Ma yella di tmura yecban tamurt n Lezzayer, d aɣunzu n tefranin i d-issebganen tugdut mačči d atteki deg-sent. Skud nettekki di tefranin, amzun akkenni nsemmeḥ deg wid akk yemmuten, wid akk yenɣa udabu amesbaṭli, rnu wid ara yemten s ya ɣer sdat; deg-sen nefka afus, aya d lɛib fell-aneɣ i d-yesgra uselway n Unvaḍ Uɛḍil.

Ɣef wayen yaɛnan tirza n Uselway n Fransa Mass François Hollande deg wussan agi i d-iteddun ɣer Lezzayer, mass Farḥat Mhenni yenna-d belli “{ Tirza n François Hollande mačči d tirza n imdukal, mačči d tirza ara yesjahedden assaɣen ger Fransa d Lezzayer. Lamaɛna d tirza n cwal… Tirza agi d ayen ara yernun laman i leḥkem azzayri…ɣef wannecta ad d-yili yiwen n unjmuɛ ussan agi i d-iteddun deg temdint n Paris deg wennar Trocadéro i wakken ad d-newwet s leqseḥ ɣef tirza agi n François Hollande ɣer Lezzayer…”}

Mass Farḥat Mhenni s yisem n Unabaḍ ad iheggi tabratt i uselway n Fransa, i wakken ad as-yesɣeti iswi, lebɣi akked wubrid id d-yewwi, ara yawi Unavaḍ deg tikli-ines ɣer tlelli n wugdud aqbayli akked tugdut.

Mass Farḥat Mhenni yemeslay-d daɣen ɣef liḥala i deg tettidir Tmurt n Iqbayliyen, ladɣa ayen yeɛnan talwit i yeẓẓeɛ udabu seg-s akked ilemẓiyen iqbayliyen yettawi udabu ɣer lɛesker akken ad ten-iceyyeɛ ɣer tmurt n Mali ad nnaɣen ɣer tama irebraben inselmen n Anṣar Ddin i d-yexleq udabu Azzayri i wakken ad yeḥbes amussu n timunent n Uzawad i ɣef ttnaɣen Imuhaɣ deg tmurt n Mali. Acku adabu azzayri yugad“{ ad yenteḍ ‘ujeǧǧiḍ’ yellan di Mali tamurt n Lezzayer}”.

Mass Farḥat yenna-d belli Tamurt n Iqbayliyen tuklal talwit. I wakken ad tilli talwit ilaq Tamurt n Iqbayliyen ad tekseb isardasen i yiman-is; isardasen ara yewten ɣef tmurt, ara iɛassen ɣef wugdud aqbayli. Acku agdud yettmettat deg lbaṭel, mačči kan d irebraben inselmen i la ineqqen, ula d irebraben n udabu neqqen, ɣeṭlen-d rrehba di tudrin n tmurt. Aya i wakken ad yettwakkes ilaq agdud aqbayli ad yesebded iserdasen ara d-yerren laman, i wakken daɣen agdud aqbayli ad yizmir ad yerr ɣef yiman-is.

Uqbel ad yesali ameslay, mass Ferḥat Mhenni iger-d tiɣri i yiqbayliyen, i wakken ad dduklen afus deg ufus, ad qablen adabu akked iqeddacen-is s tegmatt, akken ad arun amezruy i ten-irǧan acḥal d leqrun.

Di tagara Mass Farḥat yesegra-d awal n usirem ɣef yimal yettraǧun Tamurt n Iqbayliyen yenna-d{:“ Am wass-a ad d-nifrir akken id d-ufraren Ikaṭalanen, akken ara d-yifrir Uzawad, am wakken i d-yufrar Ssudan n Unẓul….”}

Irnaten Murad

2 COMMENTS

  1. Azul,

    Da Farhat aklay yidekh arama thedad tellili nay. Avrid yenjer. Afud amokran i wayen ak ithkedmedh kech ak tarvatikh.

    Tanmirt.

LEAVE A REPLY

Please enter your comment!
Please enter your name here