Azal n snat n tsaεtin i d-yella uselway n Unabaḍ Uεḍil Aqbayli d inebgi n umaṭṭaf Tamurt akken ad d-yer ɣef isteqsiyen n yimsefliden tameddit n Lḥedd iɛeddan.
Akken yuɣ tannumi, mass Ferḥat iban-d d argaz n tsertit, yesseqdac-itt i yiswiyen akked tlelli n uɣref Aqbayli mačči d nettat i t-yesseqdacen am wid yelhan akked tefranin. Xas akken yettwaṭṭef, yextar uselway n Unabaḍ ad yeǧǧ lecɣal nniḍen akken ad yili i tririt ɣef wayen i d-steqsan Yiqbayliyen i d-yessawlen s ṭṭaqa.
Mass Ferḥat Mhenni yuɣal-d ar waṭas n temsal imi deg tazwara yehder-d ɣef tmurt n Spenyul yefkan azref i Yikaṭalaniyen akken ad xtiren azekka-nsen; imi yenna-d tifranin skanayent-d asiweḍ n umennuɣ akked uzref n win yumnen s tikli-s ladɣa aɣref Aqbayli ur yemgarad ara ɣef wiyaḍ, yettnaɣ deg ubrid n tidet ara t-yessiwḍen.
Di tlemmast n tedwilt, yewweḍ-d yisali n uḥbas n Yikaṭalaniyen ɣef uxelles n tebzert d ayen yeǧǧan Ferḥat ad d-yesmekti iseggasen n Tesεin ladɣa aseggas n uḥbas n leqraya di Tmurt n Yiqbayliyen imi deg useggas-nni yakan. “{ssawleɣ i uḥbas n uxelles n tebzert di Tmurt n Yiqbayliyen maca aṭas i yewwten ad rẓen tikti-w}” i yenna Ferḥat, d ayen i d-yessakanen tamuɣli tasertant i iǧehden n uselway n Unabaḍ Aqbayli.
Deg yiwen usteqsi ɣef tirza n uselway n Fransa ɣer Lezzayer, aselway n Unabaḍ yenna:“{ ad yeεreḍ udabu n Lezzayer ad yesseqneε tigduda tis xemsa s yibeddi deg ubrid n timunent n Aẓawad imi yugad ajeǧǧiḍ n tlelli ad yaɣ abrid ar iɣerfan n Lezzayer}” ikemmel yenna :“{ nekni nheyya-d tabrat i uselway n Fransa uqbel ad yerzu ar Lezzayer nerna nheyya anejmaε di Fransa.}”
Ɣef wayen yerzan izerfan yettwaɣḍalen yal ass di Tmurt n Yiqbayliyen, inebgi n lḥerma yuɣal-d ɣer lεahed yefka deg Ugni Geɣran akken ur iḥebbes ara asuter akked umennuɣ ɣef yizerfan n yal Aqbayli imi Anabaḍ d win yekkaten ad yessiweḍ udem n lbaṭel ɣer useqqamu n waɣlanen yedduklen.
Ɣef tsertit taqbaylit akked umezruy-is, mass Ferḥat ihḍer-d ɣef sin yidlisen i yura deg uḥric-a i lmend n tsutwin i d-iteddun maca ur walan ara tafat deg yiseggasen yezrin d ayen i ɣef ara iqeddec uselway n unabaḍ akka d afella.
Di taggara n tedwilt yesnemmer mass Ferḥat imeɣnasen n Timanit s leqder u yessuter yal Aqbayli ad yeddu ɣef tidet mačči deg ubrid n FLN neɣ HMS yekkaten ad snegren aɣlan Aqbayli yettalasen azekka-ines s wufus-is.
Mulud Yunsi
