Ger tidett akked lbaṭel

6

Mazal-aγ nettidir ddaw n udabu amesbaṭli yessumen idammen n wegdud Aqbayli. Azarug i d-wwin yergazen di 1962 yuɣal d qeṭran. Imi s kra n udabu i d-yussan yeggul γef Tmurt n Yiqbayliyen ur tufi talwit.

Aqla-aɣ di tagara n 2012. Mazal lbaṭel ad d-yettarew beṭṭu ger YIqabyliyen. Ansi i d-tekka tyita? Tiyita tamqerḥant tekka-d seg uẓar i d-icetlen seg wammus n wid yezgan xedεen agdud. D acu n tmara i ten-yerran? S lebγi-nnsen, d aγuru!

Wid yeṭfen adabu sexdamen tasertit n faruq, zgan d icenga n Tmurt n Yiqbayliyen.
Ttkellixen i yimdanen belli ttmeslayen s yisem n wegdud, ɣas agdud yeẓra ɣelṭen aṭas di tsertit-nnsen.

Wannag tura uɣalen d iferεunen fell-aɣ, ccukren armi qrib ɣelben agdud s lekmal-is! Aneggaru-yagi netta, ifaq-asen, yezra yerna yeḥsa d acu yellan deg-sen, xedmen ṛṛay-nsen.

Netta Ṛebbi yeẓra belli ɣelben cciṭan di lbaṭel xeddmen. Aqbayli ad asen-iqqar belli netta ṛzan-as ul-is, ɣef aya ttaṛ-is ḥlal seg­sen. D nutni i yeččan tamurt di sṛayat-nsen, ur d-lhin d wegdud ur d-lhin d tmurt. Ad ten-ḥeqqren akk ad t-neqqen, ad ten-snejlin ɣer tmura n medden. Aqbayli ad asen-yeqqar abrid-agi d abrid n lbaṭel, ur tzemrem ara ad d-tawim ayen yelhan s werid ucmit. Anda ma ddan, di ddunit neɣ di laxeṛt. Taggara-nnsen d times n ǧahenmama ansi ur d-tefɣen ara i lebda.

Ass-a, tamurt tuɣal d annar n ilefḍan akked wammus, d lbur. Idammen uɣalen ttmirin akken yettmiri ugeffur anda nniḍen. Iqbayliyen werǧin meyzen belli yezmer ad d-yaweḍ wass anda Tamurt n Yiqbeyliyen ad ttawed i liḥala i deg tella ass-a. Ass-a iban anwa i d acengu, yeḍra lbaṭel di yal imeḍqan, di tugett n tegnatin lbaṭel-nsen iban am aggur deg ass n tziri.

Abrid mazal γezzif yenneḍ, mazal amennuγ ameqran ad-aγ-yettraju imi tidett ddaw n uceḍaḍ n labṭel. Amennuγ γef Teqbaylit mačči d yiwen n wass neγ n useggas. Amennuγ γef Teqbaylit d yal ass di tmeddurt-nneγ d yal tiqqit n idammen-nneγ, d yal tabniqt deg allaγen-nneγ. Amennuγ γef Teqbaylit d amennuγ n tidet, n teγdemt, n tegmat akked tdukli. Ass-a, s tezmert n tegmat d tdukli, s tezmert n tussna d tmussni, s tallat gar-aneγ ara d-nerr taqbaylit-nneγ d yidles-nneγ.

Crif Wanuγi