Ğğet-aγ ad nidir tafsut nneγ

2

Agdud aqbayli yecfa-d i tɣerma tamenzut n tmazγa. Si tsuta ɣer tayeḍ ddren deg umennuɣ, kkren-d mgal inbazen i d-yeffalen ɣer tmurt nsen, ggan lsas i tmetti nsen. Ma akken iffeɣ ucengu arumi, aqbayli iɣil dayen kfan wuguren.

Tagara tezzi taswiḥt fell-asen: adabu yefka tesriḥ i yigen ad kecmen γer tmurt n iqbayliyen ; xedmen deg-sen i yexdem ufransis… d acu n sebba ? acku ilemziyen ffγen-d ɣer iberdan a d-seknen lɣid nsen ɣef uḥbas n Dda Lmulud.

Yettwagzem-as webrid sɣur imsulta, sfehmen-t d akken asarag ɣef tmedyazt taqburt ad yawi arway i tmurt yebɣan talwit. Tilizri, amaṭṭaf, iɣmisen wwten ur zgilen : γeḍlen-d tebrek ɣef iqbayliyen. Yir awal suzlen-t fell-asen : wigi rran ad bdun tadukli n tmurt, d fransa i yellan deffir nsen…

Ass n 20 yebrir neɣlen-d imsulta ɣef tesdawit : xedmen axessar… wid ittnaɣen ɣef teqbaylit nsen ččan yidan deg ikesman nsen, sewwen-asen lgaz, ksen sser fell-asen, tuget deg-sen ggran-d di lḥebs, aqiri am azal am yid.

Adabu iɣil dayen yefra wurar : fran-t temsal n uqbayli, ur zrin ara acu i ten-yettrajun… Seg 20 yebrir ar ass-a, 30 iseggasen i yezrin; yal aseggas tettuɣal-d tefsut, tettawi-d yid-s asirem ara d-yerren tilelli i uqbayli. 20 yebrir 2001 tuɣal-d tefsut, mmugren-t iqbayliyen s idamen; asen i d-tlul tefsut taberkant !

Tafsut taberkant d tanekra n ilemziyen mgal tamhuqranit di tmurt n iqbayliyen. Suɣen-d i tlelli, yerra-yasen-d rrsas, nutni ifassen d ilmawen. 126 n temgaryad i yeɣlin d iseflan! Ayen walan-t wallen d wayen slan imeẓẓuγen d iwzi, mačči dayen ara d-yewsef umdan; nγan ula d aqcic n 14 iseggasen! Seg-asen ar ass-a ulac i ybedlen: wa nɣan-t, wa εeyben-t, wa urzen-t…

Ass-a, iqbayliyen ɣas ayen ak izrin fell-asen, ur gzimen ara layas, asirem nsen d akken amrar ad yeqqers, lqid ad irez, ad tefsi tallest yessirzigen tudert i iqbayliyen ad tifrir tagut ɣef tmurt n iqbayliyen, i waken ad idiren taqbaylit nsen, ad idiren tafsut nsen !