I imusnawen yessusmen

5

Ass-a yekka-yaγ-d nnig n lkanun, win ara ad t-ireglen yerba ifassen-is. Aṭṭas n wid is-isnen, maca ugar deg-sen d uzligen (neγ sneεmilen d uzligen) ifassen. Mi d as-nenna ad nessider asafu ara γ-d-ifken tafat, neḍḥa-d ziγ nugem i lkanun neǧǧa-t d asemmaḍ…Taftilt yezγuγden di tesga, yekfa deg-s lgaz, teẓra-m amek id asteḍra… Ma d asaglu i γef nettḥarab yuḍef-it maras, ljedra-s tuγal d uruz, wissen kan aẓar-nni…

Di tsusmi i yufan timenna wat wawal, almi agdud yuγal d iγid bu tciṭa, wehi-as yedda ! Itess iγeblan-is almi yesker yissen : ur yeẓri anida yeggar iḍarren-is, mi d-yuki, yufa-d ziγ yeγreq deg iriran-is…Maεna, ttif win yeṭfen wiṭ wala win yebran.

« Imusnawen-nneγ » ass-a : sewqεen lbir deg ubidun, rnan rbeḥ i yisγan ! Gran-d tturaren tinna n wakli ; mi yesla neγ yezṛa lbaḍna yini : « εuẓgeγ ur sliγ, draγleγ ur ttwaliγ, yak ggugmeγ ! Amek ara yiniγ ! » Imi akka, εummemt afrag ay allen ! Rwumt tamuγli, awimt lewhi, ma d imi yeqqen lḥenni, yedda d isli γer wid is-igezmen iles !
Tecfam akk asmi qqaren : nezmer ad nesker takka deg waluḍ ! Ma ulac maḍi, ad nessuffeγ aman deg weẓru ! Ma d aas-a teḍra yid-sen am uεekkaz n wulmu ur yekkat ur ittfuku bab-is. Ma d agdud yeṭṭfen deg ijufar-nsen, yegra-d am win yejguglen deg waḍu…

Agdud la yekkat tiqqar. Yettmerẓa netta d udabu. Maca, d ḍar-is is-yečča rkul γer yimi : yezwi-as uglan tuγmas. « Imusnawen », ass-a, fetlen-as-d berkukes, qqaren s wacu ara t-yeffeẓẓ ? Ttnezzihen mbεid am akken temsalt-is ur ten-teεni : Ma imi yettwaxdem i tmenna akked tsusmi, ayen ay « amusnaw » i tferneḍ d tasusmi-ines ? Tiṭ ma tettwaxdem i tmuγli akked tidderγelt, acimi ay« amusnaw » i tferneḍ d tidderγelt-ines ? Ameẓuγ yettwaxdemen i tiεuẓẓegt d tmesliwt, acimi ay « amusnaw » ass-a, ik-iεejben d tiεuẓẓegt-is ?

Aḍar ilaqen ad yeddu : skecmen-as zzellum ; kerfen-as tagecrirt, ssekwen-as adif. Rrebg itenicudden s agdud yebḍa, yeqzuzem, almi ur d-yeqqim deg-s wanida ara teṭṭef tyersi. Jebden-d amrar seg ansi nniḍen, ǧǧan agdud tekuffer taγect-is bḥal win yettwaxenqen deg yiḍ s tufra…zzuzfen- as asirem asmi medlen tiwwura, ḍeqren tisura, i sen-yefka, anda ur tent-yettaf yiwen. Asmi ssusfen tagella iten-icerken yid-s, ttin-as ula d tarbut, εussen fell-as ma ulac ad tt-id-yeččar yiwwas…

Qimet kan akken a « yimusnawen ». Γurwat ansi tettnekkarem ! Ggugmet ! Akken itelham i win iken-yesseqdacen, ggugmet i wakken ad tεejbem i yisγan. Acḥal tesεam sser mara tessusmem ! Γurwen lḥeq : Deεwessu n wegdud kan, d netta itt-yebγan, inuda fella-s. Γurwat ansi i ken-ttγiḍin igujilen neγ wid yemmuten d wid yettwaḍeqren deg yiderbuzen… Tasusmi-nwen teqeṭṭu-d s imelyan, ḥercet ihi imi akken i tesεam azal. Sserset iseγ ad inez, maεna awit-d ssuma yelhan ! Anfet i wegdud amcum, tiyita d-yerzan ines, lhemm ines d netta i t-yextaren, mačči newen. Kunwi taḥwaǧ-iken tmurt ! ččet aγrum, semdet tanafa, γurwat kan aken-tfat tẓallit d wid akken i ken-yuγen. Im akud yettazzal, ma ulac aken-ifat lawan…

Ma d tidett umi s-tesram, teẓram diritt ; ur tesεi ara aṭṭas n yimdukal, yerna ur temmal i yiwen melmi ara d-tas neγ ansi ara d-tek…

Γurwat ihi, ma tnuda-d yiwwas tafat γef wegdud amcum iteǧǧam i ṭlam, ilit di ttiεad, siγezfet isuraf akken ad tawḍem d imezwura γer lmiḥlal, ad tmagrem tafsut tenγam. Imiren init-as i wegdud : Yak akken i nedda ḥafi ! Assen ahat awen-yini : Ma tegra-d yid-wen tikli ?!