Imaṣriyen stufan ussan-a – S kra d-megren yeddem-it waḍu !

6

Imaṣriyen stufan-d ussan-a, siwa Idzayriyen i yesεan d ccγel, ihi atan sserbaken rennun deg izugar-nsen. Wwḍen almi d asen-nnan » D nekkni i d awen-yeslemden ula d taεrabt, acku kunwi mačči d aεraben ay tellam! ».

Ineggur-a(Idzayriyen) aṭas deg-sen i yerfan nezzeh. Tecḍeḥ zdat wallen-nsen tidet qerriḥen d tabuεeryant. Uγen-tent akken yessefk deg wulawen: Aεraben i ḥemmlen ugin-ten, tuγalin s aẓar ugin-tt neγ ṣeḍḥan yes-s » laṣel-ik yezgel-ik, win tebγiḍ yugi-k, mel-iyi-d anwa i k-ilan? ».

Seg wasmi d-necfa i yemma-s n ddunit tella, d nutni ttkellixen γef yiman-nsen, ttaran iman-nsen d Aεraben ur llin, yerna wigi zegren tilas s tiεerbubt-nsen, rran iman-nsen d Aεraben s tussda. Mi akken yerra iman-is Urumi am wakken s tidet yeffeγ si tmurt n Ledzayer di 1962, s wurfan d lγecc i d-yedden Benbella, mi akken yenna: » Ledzayer d taεrabt, d taεrabt, d taεrabt!! ». Yenna-t-id tikkelt yerna yules-as-d snat tikkal, yessed-it deg wallaγen. Yal tikkelt mi ara d-teffeγ tarwa n tmurt n yeqbayliyen s iberdan, Cennun yemdanen s wafud, qqaren » Ur nelli ara d aεraben! », imiren Idzayriyen-nniḍen ttṣeḍḥin zdat wigi llan γilen-ten d atmaten. Nuγal-asen d aẓru neγ d adγaγ di tarkast. Lemmer ttafen ad meḍlen ssemm-nneγ seddaw tmurt. Maca, ur yelli d acu ur srisen ara deg iqerray-nneγ: Tutlayt tayemmat ur tt-nelmid ara deg iγerbazen am wakken lemden akk iγerfan-nniḍen s tmeslayt-nsen timsal n ddunit deg uγerbaz, adabu d awezγi ad tafeḍ Aqbayli d netta i yellan d aqerru n tmacint-is, γas ulamma d Iqbayliyen i d-yufraren di yal annar n tmusni yerna d nutni i yennuγen Arumi, takurmut n at txidas am nutni rran-tt d axxam n waggagen-nneγ, aεebbuḍ n tmettant nefqen-as-d s tarwa-nneγ war cceḥa…atg.

« Ayen akk srewten d wayen ẓẓan, megren-t-id, yeddem-it waḍu », akka iḥulfan s yiman-nsen ass-a, s kra din iruḥ, a ziγ yelha wanzi-nni « seddaw webrid, sennig webrid, leqrar-is d abrid », siwa tidet i d tidet. Ččuren wulawen, qebren rnan tuṭṭfa n yimi. D acu d asen-d-yegran tura? Llan kra deg-sen nudan amek ara d-afen ayen ara sen-yeqden taswin-nsen xerṣum ulammer s umezruy. Aγmis n iγallen uffiren (Ccuruq) yettwassnen s tiyitwin-is mgal Iqbayliyen n tidet, win akken yeqqaren daγen ulac d acu d-yezgan sennig tutlayt taεrabt yewweḍ almi d-yura γef Cacnaq, agellid amaziγ yeγleb imaṣriyen deg useggas 950 z.t.!!! Daγen mačči d Ccuruq kan i terra tmara s amezruy imaziγen, yesseqdec d ttawil i tririt n ttar mgal adabu d wegdud amaṣri iwumi yeṭṭef tuḥsift.

Γur-i yiwen umeddakel di twuri (lxedma) leḥmala-s metwal taεerbubt tezger akin i tayri, yesleblub taεrabt s wacciwen-is, mi akken yesla i wayen t-yerran ur yuminen ara ula d imeẓẓuγen-is, yenna-yi-d: « Teẓriḍ ay ameddakel, almi d iḍelli i ḥulfaγ i tikkelt tamenzut di ddunit-iw s uẓar amaziγ yerna s tidet ». Ssakdeγ-t, uγaleγ nniγ-as »Ugten iẓuran imaziγen ay ameddakel, nekk timmuzγa-w d taqbaylit! ».