Imal n Teqbaylit : ma tenqeḍ deg ulawen d yilsawen n imawlan-is, i wumi-yas tira?

37

Ger tlufa yerḥan igad d ttigad yeṭṭfen deg tnekkit-nsen taqbaylit tella tin n tutlayt. Tagi “{ur telli ara kan d allal n taywalt. D nettat id ustu n idles, i yettεebbin tinekkit, azalen d tmuɣli i yettak yal agdud i tmeddurt d umaḍal}” akken d-yura deg rabul n UNESCO ɣef imal n tutlayin deg umaḍal.

Ma yella ɣer Iqbayliyen aṭas ur tt-nefri ara d yiman nsen, deg tmurt ass n wass-a aselmed n teqbaylit yuɣal ttwalin-t kra n yemdanen s weḥqar amzun akken mačči d tutlayt am tiyaḍ. Igerdan regglen ɣef tɣuri, iselmaden sseɣlin azal nsen almi ula d iɣerbazen n tmaziɣt di tesdawiyin ttwalin-ten inelmaden nniḍen s yir tamuɣli.

Askasi d-yellan deg Radio Numydia ɣef taluft agi yeččuṛ s inagan d isawalen qrriḥen si yal tamnaṭ n umaḍal. Deg tmurt, yuɣal umeslay n taεrabt i zzux ma d taqbaylit tettbini-d d tutlayt kan n imesdurar.

Deg inig, deεwessu ur tezgil ara leqbayel, xas akken d wid yeɣṛan. D. Addar, yellan d taneɣmast deg Radio tis snat, yettidiren tura deg Montreal (Kanada), tenna-d d akken ula dinna iqbayliyen bran i ṭbel deg waman u “smenyifen ad fken arraw nsen ad lemden taεrabt wala taqbaylit !!” Imawlan ur d-cligen ara deg tarwa nsen imi ssikiden kan ma yella tutllayt ara lemden a sen d-ssekcem adrim neɣ uhu.

Iminigen n tmura nniḍen, ur ten-tezgil ara. Dɣa tawacult Mezaiche yettilin deg Marikan tejbed-d ɣef taluft n tarwa nsen umi bɣan “{ad aɣen iqbayliyen d teqbayliyin akken ad ssidren tutlayt d yedles-nsen} ».

Tikwal d Iqbayliyen maḍi i yettagin ad lemden u ad smeresen taqbaylit. S A, tenna belli d argaz-is i s-yugin ad mmeslayen taqbaylit deg uxxam. Ula d tidukliwin tidelsanin, rrant aselmed n tultlayt ɣer deffir u smenyifent timeɣriwin n cḍeḥ, tirbutin n seksu d tqendyar n leqbayel. Ma mačči d wagi i d lfulkuṛ wissen d acu-t ihi ?

Maca xas akka, asirem ur yeǧǧi ara imdanen u aṭas i yettnaɣen akken a d-tidir tutlayt taqbaylit deg wennaṛ. Nura akk d Malika deg temdint n Marsay, sbeddent-d yiwet n tidukla ara d-ylhun d uselmed n Teqbaylit, segmi tid yellan ar ass-a ur εnint ara ad gent kra.

Ahat ayen icerken akk tilufa agi d tikin ur d nerzi ara ɣef Iqbayliyen, segmi ur sεin ara kra n wallalen n n telɣut ara ten-id-yessakin u a ten-isduken ɣef yiwen wawal.

Dɣa amussu n timanit i tmurt n iqbayliyen ifaq s wanect-agi. D almi d-issawel deg umenzu n yennayer izrin i iqbayliyen akken a d-rren azal i tutlayt-nsen u ad tt-smersen deg yal annar n tudert. Maca akken d-tenna tneɣmast D. Addar, “iban-d tura d akken, iqbayliyen d imaziɣen, skud ur sεin ara iwunak ara sedduyen s timmad-nsen, ur zmiren ara ad ḍemnen imal i tutlayin-nsen”.

Ass n wass-a tutlayin timeεlalin tegguni-tent akk tmettant. Ma yella Taqbaylit tezeger-d acḥal d timiḍa akken a ɣ-d-taweḍ, ur ilaq ara a nestehzi deg-s u ad ttneǧǧ ad texsi deg ilsawen. Ma yella tenqeḍ deg ulawen d yilsawen n wid tt-ittmeslayen, ula i s-d-gent tira.

Mohand-Ali ALLIOUI