IMI D-LULEɣ D AQBAYLI…

4

Ur yewwid ara wagur seg mi teḍra tedyant-nni n Yinelmaden Iqbayliyen ,hatan yettkemmil karuh akked lɣiḍ ɣer Yiqbayliyen.

Tikkelt-a d imdebbren n Useqqamu Asdawan n Umussu n Timanit i wumi teḍra imi heyyan-d yiwet n temlilit gar-asen deg uɣaram asdawan Buxrisa ,ugur yella-d deg unekcum n uɣaram-agi imi i d-ɛerḍen aselway n tseqqamut n At Yeεla n Umussu n Timanit M.Y.Aselway n Useqqamu Asdawan X.B akked yimdebbren-nniḍen A.T M.OU bdan la ttawin ttarran deg wawal akked yiεassasen n tewwurt n uɣaram ,ineggura-yagi ugin ad ǧǧen M.Y ad yekcem.Aselway X.B yenna-yasen d akken d ameεraḍ i d-yusa ɣur-s d azref-is tnubga-yagi ;d ayen i yebdan yesserfay iεessasen acku yettunefk-asen lamer sɣur unemhal n uɣaram belli ulac win ara d-ikecmen ma ur yelli ara d anelmad.

Ur teḥbis ara dagi acku imdebbren s yisem-nsen d inelmaden heddren akked yiεassasen s usaḍuf n tneɣleft ur d-nessedda annect-a i ɣef d-qqaren ,asaḍuf-agi ur yeεǧib ara maḍi iεessasen i yuɣalen d ticekkarin n wurfan ladɣa yiwen deg-sen yessuter seg A.T ad s-yefk abruy n wakud akken ad as-yini kra n wawalen d ayen i yeqbel unelmad-imdebber maca dindin kan yuɣal-d am akken yella wayen ur as-neεǧib ,imiren yesteqsa-t M.Y ɣef wayen i s-d-yenna yerra-yas A.T belli d rregmat acku yenna-yas kečč ma seg At wertiran neɣ Buεendas neɣ At Yeεla ,imdebber yenna-yas : seg At wartiran aεessas-nni dɣa yenna-yas :  » kunwi s tamiwin-agi tεewjem « .

Ameεraḍ M.Y akked X.B ugaren aman ɣef tmes imi slan i waya u bdan la heddren d win yenwan εewjen maca imeddukal n uεessas-nni d wid yeffɣen i leεqel acku ur εriḍen ara yak ad mmeslayen ɣef rregmat-agi mgal Iqbayliyen yernu ssawḍen ad s-inin i X.B d akken ad t-wwten ma yebɣa ad yeffeɣ ɣer berra.
Iqbayliyen bdan ttnejmaεen-d imi terza taluft Iqbayliyen maca aselway yesres-asen-d leεqel imi ur yebɣi ara ad timɣur taluft.

Di taggara win akken i iregmen timnaḍin n Leqbayel yefuḥ-d tazmert n yinelmaden-agi akked leḥdaqa-nsen i izemren ad s-d-yawin ayen ara t-yesnedmen ,ladɣa kra kan n ddqayeq iruḥ-d ɣur-sen yessutur ssmaḥ imi yettwali iman-is yeɣleḍ ladɣa d win i icudden mliḥ ɣer temsalt-nni n rregmat imi yal tikkelt yettales-as-d :  » Leqbayel akk ssnen-iyi ssneɣ-ten dagi ula d tameṭṭut-iw d Taqbaylit ,d zzεaf kan wamma ugar-ɣ-k s 10 iseggasen maca d kečč i ireẓnen fell-i…atg  »
Imdebbren sḥassfen imi yal tikkelt ttafen-d iman-nsen sdat n tlufa am tagi u nnan-d :  » mačči d aneqqis ara ɣ-isrekden neɣ d tiyita n yiεessasen ,d Timanit kan i izemren ad tefru karuh akked wuguren nettemlil berra i Tmurt n Yiqbayliyen « .